టీమిండియా క్రికెటర్ రిషభ్ పంత్ రోడ్డు ప్రమాదానికి గురైన సంగతి తెలిసిందే. ప్రస్తుతం పంత్ ఆస్పత్రిలో చికిత్స తీసుకుంటున్నాడు. తీవ్రంగా గాయపడిన పంత్ ఇప్పుడిప్పుడే కోలుకుంటున్నాడు. ఈ తరుణంలో పంత్ త్వరగా కోలుకోవాలని టీమిండియా క్రికెటర్లు ప్రత్యేక ప్రార్ధనలు చేశారు. క్రికెటర్లు సూర్యకుమార్ యాదవ్, కుల్ దీప్ యాదవ్, వాషింగ్టన్ సుందర్ మధ్యప్రదేశ్ లోని ఉజ్జయిని మహాకాళేశ్వర్ ఆలయంలో ప్రత్యేక పూజలు చేశారు. వారితో పాటు భారత క్రికెట్ జట్టు స్టాఫ్ కూడా పూజలో పాల్గొన్నారు.
స్వామి దర్శనం అనంతరం సూర్యకుమార్ యాదవ్ మీడియాతో మాట్లాడారు. రిషభ్ త్వరగా కోలుకోవాలని ఆ దేవుడిని ప్రార్థించినట్లుగా తెలిపారు. ప్రస్తుతం రిషభ్ జట్టులోకి రావడం ఎంతో అవసరమని తెలిపారు. మరోవైపు రేపు భారత్, న్యూజిలాండ్ మధ్య మూడో వన్డే మ్యాచ్ జరగనుంది. మధ్యప్రదేశ్ లోని ఇండోర్ లో ఈ మ్యాచ్ జరుగుతుంది. ఈ సిరీస్ లోని మూడు వన్డేలల్లో ఇప్పటికే రెండు మ్యాచుల్లో టీమిండియా గెలుపొందింది. దీంతో 2-0 ఆధిక్యతతో భారత్ ఉంది.
