Hathras Stampede: జూలై 2 తేదీ… సమయం మధ్యాహ్నం 1.30… స్థలం: ఉత్తరప్రదేశ్‌లోని హత్రాస్ జిల్లా. ఇక్కడ ఫుల్‌రౌ గ్రామంలో భోలే బాబా అలియాస్ సూరజ్‌పాల్ సత్సంగం జరిగింది. సత్సంగాన్ని వినేందుకు లక్షలాది మంది తరలివచ్చారు. సత్సంగం ముగిసిన వెంటనే ఒక్కసారిగా తొక్కిసలాట జరిగింది. ఇందులో 121 మంది భక్తులు మరణించారు. 30 మందికి పైగా గాయపడ్డారు. ఈ కేసులో చీఫ్ సేవదార్ దేవ్ ప్రకాష్, గుర్తు తెలియని వ్యక్తులపై పోలీసులు ఎఫ్ఐఆర్ నమోదు చేశారు. అయితే తొక్కిసలాట కారణంగా ఇంత మంది చనిపోవడం ఇదే తొలిసారి కాదు.
చదవండి:Uttar Pradesh: భోలే బాబా పాదధూళి కోసం.. 121 మంది దుర్మరణం
ఇంతకు ముందు కూడా దేశంలో దేవాలయాలు లేదా ఇతర మతపరమైన ప్రదేశాలలో తొక్కిసలాట జరిగినప్పుడు చాలా మంది భక్తులు ప్రాణాలు కోల్పోయారు. ఇలాంటి కేసులు చాలా వెలుగులోకి వచ్చాయి. మహారాష్ట్రలోని మంధర్‌దేవి ఆలయం, రాజస్థాన్‌లోని చాముండా దేవి ఆలయంలో తొక్కిసలాట కూడా వీటిలో ఉన్నాయి. ఇవే కాకుండా ఏళ్ల తరబడి ఇలాంటి ప్రమాదాలు చాలానే జరుగుతున్నాయి. అలాంటి ప్రమాదాలను ఒకసారి పరిశీలిద్దాం…
* మార్చి 31, 2023న ఇండోర్ నగరంలోని ఒక ఆలయంలో రామ నవమి సందర్భంగా నిర్వహించిన హవన్ కార్యక్రమంలో పురాతన ‘స్టెప్‌వెల్’ (బావి)పై నిర్మించిన స్లాబ్ కూలిపోవడంతో 36 మంది మరణించారు.
* జనవరి 1, 2022న జమ్మూ కాశ్మీర్‌లోని ప్రసిద్ధ మాతా వైష్ణో దేవి ఆలయంలో భక్తుల రద్దీ కారణంగా గందరగోళం ఏర్పడింది. ఈ తొక్కిసలాటలో 12 మంది మరణించగా, డజను మందికి పైగా గాయపడ్డారు.
చదవండి:Pm Modi: విపక్ష ఎంపీకి గ్లాసు నీళ్లు ఇచ్చిన మోదీ.. వైరల్ అవుతున్న వీడియో
* జూలై 14, 2015న ఆంధ్రప్రదేశ్‌లోని రాజమండ్రిలో ‘పుష్కరం’ ఉత్సవాల మొదటి రోజున గోదావరి నది ఒడ్డున ఉన్న ప్రధాన స్నానఘట్టం వద్ద తొక్కిసలాట జరిగింది. ఈ ఘటనలో 27 మంది యాత్రికులు మరణించగా, మరో 20 మంది గాయపడ్డారు.
* అక్టోబర్ 3, 2014న దసరా వేడుకలు ముగిసిన వెంటనే పాట్నాలోని గాంధీ మైదాన్‌లో తొక్కిసలాట జరిగింది. ఈ ఘటనలో 32 మంది మృతి చెందగా, 26 మంది గాయపడ్డారు.
* అక్టోబర్ 13, 2013న, మధ్యప్రదేశ్‌లోని దతియా జిల్లాలోని రతన్‌ఘర్ దేవాలయం సమీపంలో నవరాత్రి పండుగ సందర్భంగా తొక్కిసలాట జరిగింది. ఇందులో 115 మంది మృతి చెందగా, 100 మందికి పైగా గాయపడ్డారు.
* నవంబర్ 19, 2012న పాట్నాలోని గంగా నది ఒడ్డున అదాలత్ ఘాట్ వద్ద ఛత్ పూజ సందర్భంగా తాత్కాలిక వంతెన కూలిపోవడంతో తొక్కిసలాట జరిగింది. దాదాపు 20 మంది మృతి చెందగా, పలువురు గాయపడ్డారు.
* నవంబర్ 8, 2011న హరిద్వార్‌లోని గంగా నది ఒడ్డున ఉన్న హర్-కీ-పౌరీ ఘాట్ వద్ద అకస్మాత్తుగా తొక్కిసలాట జరిగింది. ఇందులో 20 మంది చనిపోయారు. పలువురు గాయపడ్డారు.
* జనవరి 14, 2011న కేరళలోని ఇడుక్కి జిల్లాలోని పులమేడు వద్ద ఇంటికి వెళ్తున్న యాత్రికులను జీపు ఢీకొనడంతో తొక్కిసలాట జరిగింది. ఇందులో 104 మంది శబరిమల భక్తులు మృతి చెందగా, 40 మందికి పైగా గాయపడ్డారు.
* మార్చి 4, 2010న ఉత్తరప్రదేశ్‌లోని ప్రతాప్‌గఢ్ జిల్లాలో కృపాలు మహారాజ్‌కి చెందిన రామ్ జానకి ఆలయంలో జరిగిన తొక్కిసలాటలో దాదాపు 63 మంది చనిపోయారు. స్వయం ప్రకటిత దేవుడి నుండి ఉచిత బట్టలు, ఆహారం పొందడానికి ప్రజలు గుమిగూడారు.ః
చదవండి:Hathras stampede: హత్రాస్ ఘోర ప్రమాదం.. సత్సంగం 78మంది నిర్వాహకుల ఫోన్లు స్విచ్ ఆఫ్
* సెప్టెంబర్ 30, 2008న, రాజస్థాన్‌లోని జోధ్‌పూర్ నగరంలోని చాముండా దేవి ఆలయంలో బాంబు పేలుడు పుకార్లు తొక్కిసలాటకు దారితీశాయి. దాదాపు 250 మంది భక్తులు మృతి చెందగా, 60 మందికి పైగా గాయపడ్డారు.
* ఆగష్టు 3, 2008న, హిమాచల్ ప్రదేశ్‌లోని బిలాస్‌పూర్ జిల్లాలో ఉన్న నైనా దేవి ఆలయంలో రాక్‌ పడిపోతుందన్న పుకార్లు తొక్కిసలాటకు దారితీశాయి. ఇందులో 162 మంది మృతి చెందగా, 47 మంది గాయపడ్డారు.
* జనవరి 25, 2005న, మహారాష్ట్రలోని సతారా జిల్లాలోని మంధర్‌దేవి ఆలయానికి వార్షిక తీర్థయాత్రలో 340 మందికి పైగా భక్తులు చనిపోయారు. ఇందులో వందలాది మంది గాయపడ్డారు.
* ఆగస్టు 27, 2003న మహారాష్ట్రలోని నాసిక్ జిల్లాలో కుంభమేళాలో పవిత్ర స్నాన సమయంలో తొక్కిసలాట జరిగింది. ఈ ఘటనలో 39 మంది మృతి చెందగా, 140 మంది గాయపడ్డారు.
