ప్రస్తుతం ప్రభాస్ భారీ పాన్ ఇండియా చిత్రాలు చేస్తున్న సంగతి తెలిసిందే. వాటిలో ఓం రౌత్ దర్శకత్వంలో ‘ఆదిపురుష్’ మూవీ రామాయణం ఆధారంగా తెరకెక్కుతోంది. ఇందులో రాముడిగా ప్రభాస్ భారీ కటౌట్‌తో కనిపించనున్నాడు. వచ్చే ఏడాది జనవరి 12న ఈ చిత్రం రిలీజ్‌ కానుంది. ఈ క్రమంలో ప్రభాస్‌కు అరుదైన గౌరవం దక్కినట్టు తెలుస్తోంది. ఈ ఏడాది ఢిల్లీలోని రామ్‌లీలా మైదానంలో జరగబోయే దసరా ఉత్సవాల్లో.. ప్రభాస్ చేతుల మీదుగా రావణ దహనం జరగనుందని తెలుస్తోంది. అక్టోబర్‌ 5న విజయ దశమి వేడుకలు జరగనున్నాయి. దాంతో సెప్టెంబర్‌ 26 నుంచే దసరా ఉత్సవాలు ప్రారంభమవనున్నాయి.
ఇక ఎప్పటిలాగే చెడుపై మంచి సాధించిన విజయానికి గుర్తుగా ఈ సారి దసరాకు.. ప్రభాస్ రావణ దహనం చేయబోతున్నాడని వినిపిస్తోంది. గతంలో బాలీవుడ్ స్టార్స్ అక్ష‌య్ కుమార్‌, అజ‌య్ దేవ్‌గ‌న్‌, జాన్ అబ్ర‌హం లాంటి హీరోలు ఈ అవకాశాన్ని అందుకున్నారు. దాంతో ఇప్పుడు తొలిసారి సౌతిండియా నుంచి ప్రభాస్‌కు ఈ ఛాన్స్ దక్కనుందనే చెప్పాలి. అయితే ఈ విషయం ప్రభాస్ అభిమానులకు సంతోషం ఇచ్చేలా ఉన్నా.. రెబల్ స్టార్ కృష్ణంరాజు లేని లోటు మాత్రం తీవ్రంగా కలిచి వేస్తోంది. ఇలాంటి టైంలో ప్రభాస్ ఈ వేడుకకు హాజరవుతారా లేదా అనేది సందేహమే. అయితే కృష్ణంరాజు మరణానికి ముందే ప్రభాస్‌కు ఈ ఆహ్వానం అందినట్టు సమాచారం. ఏదేమైనా సోషల్ మీడియాలో ప్రభాస్ కన్నీటి పర్యంతమైన వీడియోలు చూసి.. ఇంకా ఎమోషనల్ అవుతునే ఉన్నారు అభిమానులు.
