టాలీవుడ్ నిర్మాత దిల్ రాజు ఇంట తీవ్ర విషాదం నెలకొంది. దిల్ రాజు తండ్రి శ్యాంసుందర్ రెడ్డి (86) సోమవారం తుది శ్వాస విడిచారు. గతకొంతకాలంగా శ్యాంసుందర్‌రెడ్డి అనారోగ్య సమస్యలతో బాధపడుతూ చికిత్స తీసుకుంటున్నారు. ఈ తరుణంలోనే సోమవారం రాత్రి ఆయన కన్నుమూశారు. శ్యామ్‌ సుందర్‌రెడ్డికి ముగ్గురు కుమారులు ఉన్నారు. విజయ్ సింహారెడ్డి, నరసింహారెడ్డి తర్వాత మూడో కుమారుడు దిల్ రాజు ఉన్నారు. దిల్ రాజు అసలు పేరు వెంకట రమణారెడ్డి అయినా ఆయన తన పేరును మార్చుకున్నారు.
చదవండి: Game Changer: గేమ్‌ ఛేంజర్‌ కొత్త షెడ్యూల్‌ షురూ..
చిన్నప్పటి నుంచి దిల్ రాజును ఆయన కుటుంబ సభ్యులంతా రాజు అంటూ పిలిచేవారు. దిల్ సినిమా తీసి విజయం సాధించిన తర్వాత ఆయన తన పేరును దిల్ రాజు అని మార్చుకున్నారు. ఆయన స్వస్థలం నిజామాబాద్‌ జిల్లా కాగా పైచదువుల కోసం హైదరాబాద్‌కు వచ్చి ఇక్కడే సెటిల్ అయ్యారు. సినీ ఇండస్ట్రీలోకి రాకముందు దిల్ రాజు కొన్ని వ్యాపారాలు చేశారు. ఆ తర్వాత సినీ డిస్ట్రిబ్యూటర్‌గా మారి మంచి లాభాలను పొందారు. టాలీవుడ్ ఇండస్ట్రీలో ‘దిల్’ సినిమాతో నిర్మాతగా మారారు.
