వరుణ్ సందేశ్(Varun Sandesh) అమెరికా నుంచి వచ్చిన తర్వాత ఆయన బిగ్ బాస్ షోలో మెరిశాడు. బిగ్ బాస్ లో టాప్ 5 లో నిలిచి అందరిచేత మంచి పేరు సంపాదించుకున్నాడు. కాగా, ఇప్పుడిప్పుడే మళ్లీ సినిమాలు చేయడం మొదలుపెట్టాడు. తాజాగా ఆయన మరో సినిమాకి సైన్ చేశాడు. వరుణ్ సందేశ్ హీరోగా ఆర్యన్ సుభాన్ ఎస్.కె దర్శకత్వంలో ఓ సినిమా తెరకెక్కుతోంది. జాగృతి మూవీ మేకర్స్ పతాకంపై బలగం జగదీష్ నిర్మిస్తున్నారు. ఈ సినిమాకి “ది కానిస్టేబుల్” అని పేరు ఖరారు చేశారు. కాగా ఈ చిత్రం పూజా కార్యక్రమాలు బుధవారం హైదరాబాద్ లో నిర్వహించారు. బి.నిఖిత జగదీష్ కెమెరా ఆన్ చేయగా, బి జే రిథిక క్లాప్ కొట్టారు.
ఈ సందర్భంగా హీరో వరుణ్ సందేశ్ మాట్లాడుతూ…. ఈ తరహా చిత్రం తను మునుపెన్నడూ చేయలేదని, ఒక ఎమోషనల్ కానిస్టేబుల్ పాత్రలో ఇందులో నటిస్తున్నానన్నారు. దర్శకుడు చెప్పిన కథ, కథనం తననెంతగానో ఆకట్టుకున్నాయనీ, ఈ చిత్రంలో నటిస్తుండటం తనకెంతో ఆనందం కలిగిస్తోందని అన్నారు. దర్శకుడు ఆర్యన్ సుభాన్ SK మాట్లాడుతూ, సస్పెన్స్ క్రైం థ్రిల్లర్ చిత్రమిదని చెప్పగా, జూన్ 5 వ తారీఖు నుంచి రెగ్యులర్ షూటింగ్ ప్రారంభం కానున్నట్లు, మిగతా నటీనటుల ఎంపిక జరుగుతున్నట్లు నిర్మాత బలగం జగదీష్ తెలిపారు.
