తిరుపతి బస్టాండ్‌లో రెండేళ్ల బాలుడు కిడ్నాప్ ఘటన కలకలం రేపింది. తెల్లవారుజామున 2 గంటలకు బాలుడు అరుణ్ మురుగన్‌ను గుర్తు తెలియని వ్యక్తి తీసుకెళ్లినట్లు పోలీసులు సీసీఫుటేజ్ ద్వారా తెలుసుకున్నారు. తమిళనాడు రాజధాని చెన్నై నుంచి అరుణ్ మురుగన్ కుటుంబం తిరుమల శ్రీవారిని దర్శించుకుని ఇంటికి తిరుగు ప్రయాణమైంది.
చదవండి: Chandrababu: చంద్రబాబు పిటిషన్‌పై నేడు సుప్రీంకోర్టులో విచారణ..టీడీపీ వర్గాల్లో టెన్షన్!
శ్రీవారి దర్శనం ముగిసిన తర్వాత తిరుపతి బస్టాండ్‌కు రాత్రి 12 గంటలకు చేరుకుంది. అర్థరాత్రి కావడంతో బస్టాండ్ లోనే బాలుడి కుటుంబం నిద్రపోయింది. అయితే తెల్లవారుజామున 2.30 గంటల సమయంలో ఆ బాలుడు కనిపించలేదు. బస్టాండ్ మొత్తం వెతకగా ఎక్కడా కనపడలేదు. దీంతో బాలుడి కుటుంబం పోలీసులకు ఫిర్యాదు చేసింది.
చదవండి: Nara Lokesh: తగ్గేదే లే అంటున్న లోకేశ్.. సీఎం జగన్‌పై ఫైర్
గుర్తుతెలియని వ్యక్తులు బాలుడిని కిడ్నాప్ చేసినట్లుగా పోలీసులు భావిస్తున్నారు. అయితే బాలుడి కిడ్నాప్ వెనుక ఓ మహిళతో పాటు మరో ఇద్దరు వ్యక్తులు ఉన్నట్లు పోలీసులు భావిస్తున్నారు. సీసీటీవీ ఫుటేజీ ఆధారంగా పోలీసులు దర్యాప్తును ముమ్మరం చేశారు. ప్రత్యేక పోలీస్ బృందాలు బాలుడు ఆచూకీ గుర్తించే పనిలో పడ్డాయని సీఐ మహేశ్వర్ రెడ్డి తెలిపారు.
చదవండి: Bandaru Satyanarayana Murthy: టీడీపీ నేత బండారు సత్యనారాయణ అరెస్ట్
ఏర్పేడులో సురక్షితం:
తప్పిపోయిన బాలుడు ఏర్పేడులో సురక్షితంగా ఉన్నట్లు సమాచారం. ఓ మహిళ బాలుడిని అప్పగించినట్లుగా ఏర్పేడు పోలీసులు తెలిపారు. రాత్రి 2 గంటల ప్రాంతంలో తప్పిపోయిన బాలుడు ఏర్పేడులో పోలీసుల చెంతకు చేరాడు. దీనిపై పోలీసులు ముమ్మర దర్యాప్తు చేపడుతున్నారు. బాబును ఎత్తుకెళ్లిన గుర్తుతెలియని వ్యక్తి కోసం పోలీసులు గాలింపు చర్యలు చేపడుతున్నారు.
