nara lokesh reaches pes hospital to meet taraka ratna
యువగళం పేరుతో టీడీపీ యువనేత నారా లోకేశ్ ఈరోజు నుంచి ఏపీలో పాదయాత్ర ప్రారంభించిన విషయం తెలిసిందే. అయితే.. ఇవాళ ప్రారంభమైన పాదయాత్రలో చిన్న అపశృతి చోటు చేసుకుంది. చిత్తూరు జిల్లా కుప్పంలో పాదయాత్ర ప్రారంభం అయిన తర్వాత లోకేశ్ తో పాటు పాదయాత్రలో పాల్గొన్న నందమూరి తారకరత్న అస్వస్థతకు గురయ్యారు. ఆయనకు గుండెపోటు రావడంతో అక్కడికక్కడే కుప్పకూలిపోయారు. దీంతో ఆయన్ను వెంటనే సమీపంలోని ఆసుపత్రికి తరలించారు. ఆ తర్వాత కుప్పంలోని పీఈఎస్ ఆసుపత్రికి తరలించారు.
అక్కడే వైద్యులు చికిత్స అందిస్తున్నారు. తారకరత్న ఆరోగ్య పరిస్థితిని సమీక్షించేందుకు బెంగళూరులోని నారాయణ హృదయాలయ నుంచి ప్రత్యేక వైద్యుల బృందం పీఈఎస్ కు చేరుకుంది. ఇక.. నారా లోకేశ్ కూడా తన పాదయాత్ర ఇవాళ పూర్తి కాగానే నేరుగా పీఈఎస్ ఆసుపత్రికి చేరుకున్నారు. అక్కడ తారకరత్న ఆరోగ్య పరిస్థితిని వైద్యులను అడిగి తెలుసుకున్నారు. బెంగళూరు నుంచి వచ్చిన వైద్యుల బృందాన్ని వివరాలు అడిగి లోకేశ్, బాలకృష్ణ తెలుసుకున్నారు. మెరుగైన వైద్యం కోసం మరికాసేపట్లో తారకరత్నను బెంగళూరుకు తరలించనున్నారు.
