ఇటీవల కాలంలో గుండెపోటు మరణాలు బాగా పెరిగాయని మంత్రి హరీష్ రావు పేర్కొన్నారు. చిన్న, పెద్ద అనే తేడా లేకుండా హార్ట్ ఎటాక్ కారణంగా ప్రాణాలు కోల్పోతున్నారని ఆయన అన్నారు. ఇది ఆలోచించాల్సిన విషయమని.. మన కళ్లముందే ప్రాణాలు కోల్పోతున్న ఘటనలు ఎన్నో చూస్తున్నామని చెప్పారు. ప్రాణనష్టాన్ని తగ్గించేందుకు ముఖ్యమంత్రి కేసీఆర్ రాష్ట్ర వ్యాప్తంగా సీపీఆర్ పై అవగాహన కల్పించాలని, శిక్షణ ఇప్పించాలని నిర్ణయం తీసుకున్నట్లు వెల్లడించారు.
ఈ మేరకు… సంగారెడ్డి కలెక్టరేట్‌లో CPRపై నిర్వహించిన శిక్షణ కార్యక్రమంలో ఆయన పాల్గొన్నారు. సడెన్ కార్డియాక్ అరెస్ట్, హార్ట్ ఎటాక్ రెండూ ఒకటే అని చాలా మంది అనుకుంటారని.. వైద్య నిపుణులు చెబుతున్న దాని ప్రకారం అవి రెండూ వేర్వేరు అని హరీశ్ రావు వెల్లడించారు. సడెన్ కార్డియాక్ అరెస్ట్.. అంటే అనుకోని ప్రమాదాలు, దుర్ఘటనలు జరిగినప్పుడు మనిషి సైక్లాజికల్ షాక్‌కు గురవుతాడని చెప్పారు. ఈ సమయంలో హృదయ స్పందనలో తేడా వస్తుందని… గుండె లయ తప్పి ఆగిపోతుందని చెప్పారు. మనిషి స్పందించక.. శ్వాస ఆగిపోతుందని చెప్పారు. ఆ సమయంలో గుండె కొట్టుకునేలా ఛాతి మీద పదే పదే ఒత్తిడి చేయడం, నోటి ద్వారా కృత్రిమ శ్వాసను అందించడం వల్ల గుండె ఊపిరితిత్తులు తిరిగి పని చేస్తాయి. దీన్నే సీపీఆర్ అంటారని చెప్పారు.
ఇంత చేసినా కొన్ని సార్లు గుండె స్పందించదని.. ఆ సమయంలో ఆటోమేటిక్ ఎక్స్ టర్నల్ డెఫిబ్రిలేటర్స్ (AED) అనే వైద్య పరికరం ద్వారా ఛాతి నుంచి గుండెకు స్వల్ప మోతాదులో ఎలక్ట్రిక్ షాక్ ఇవ్వడం ద్వారా గుండె తిరిగి పని చేసేలా చేయడం సాధ్యమవుతుందని అన్నారు. సీపీఆర్ తెలిసిన వారు ఉంటే సీపీఆర్ చేసి వారి ప్రాణాలు కాపాడే అవకాశం ఉంటుందన్నారు.
‘‘దేశ వ్యాప్తంగా ప్రతి రోజు దాదాపు 4 వేల సడెన్ కార్డియాక్ అరెస్టులు జరుగుతుండగా., ఇందులో 90శాతం మంది ప్రాణాలు కోల్పోతున్నట్లు గణాంకాలు చెబుతున్నాయి. ఇందులో 75 శాతం ఆసుపత్రుల బయట జరుగుతుండగా, 15 శాతం పబ్లిక్ ప్లేసుల్లో జరుగుతున్నాయి. ప్రాణాపాయంలో ఉన్న వారికి సీపీఆర్ చేసేందుకు చదువు అవసరం లేదు. మెడికల్ పరిజ్ఞానం అవసరం లేదు. వయస్సుతో సంబంధం లేదు. ఎవరైనా సిపిఆర్ చేసి ప్రాణాన్ని కాపాడవచ్చు. దీని మీద సమాజంలో అవగాహన లేదు. ఎవరూ దృష్టి సారించడం లేదు. ఇది కూడా ప్రాథమిక చికిత్సలో భాగమే.’’ అన్నారు.
‘‘ఇందులో భాగంగా, పారామెడికల్ సిబ్బందితో పాటు, వైద్యు సిబ్బంది, మున్సిపల్ సిబ్బంది, పోలీసు, కమ్యూనిటీ వాలంటీర్లు, ఉద్యోగులు, రెసిడెన్షియల్ అపార్ట్‌మెంట్ల ప్రతినిధులు, సిబ్బంది, కమర్షియల్ కాంప్లెక్స్ వర్కర్స్ ఇలా వివిధ వర్గాలకు చెందిన వ్యక్తులకు సీపీఆర్ మీద శిక్షణ ఇవ్వటం జరుగుతుంది. ఇందుకు గాను ప్రతి జిల్లాకు ఐదుగురు మాస్టర్ ట్రైనర్లను ఏర్పాటు చేసుకుంటున్నాం. వీరు జిల్లాల్లో మిగతా సిబ్బందికి శిక్షణ ఇస్తారు. రాష్ట్ర వ్యాప్తంగా ఉన్న జీహెచ్ఎంసీ, మున్సిపాలిటీల సిబ్బందికి శిక్షణ ఇస్తున్నాం. దీని కోసం రూ. 15 కోట్లతోఅవసరమైన 1262 ఏఈడి మిషన్లు ప్రొక్యూర్ చేసుకోని, అన్ని సీహెచ్సీలు, యూపీహెచ్సీలు, బస్తీ దవాఖానల్లో ఏర్పాటు చేయబోతున్నాం.’’ అని హరీశ్ రావు వెల్లడించారు.
