Ambedkar
డాక్టర్ బాబా సాహెబ్ అంబేడ్కర్ 132వ జయంతి (132 ambedkar jayanti) సందర్భంగా ఆయనకు రాజకీయ నాయకుల నుండి సామాన్యుల వరకు అందరూ నివాళులు అర్పిస్తున్నారు. కులజాడ్యంపై పోరాడారు… సమానత్వం కోసం అహర్నిషలు పని చేశారు. స్వాతంత్రం సిద్ధించిన తర్వాత భారత భవిష్యత్తు కోసం అంబేడ్కర్ ఆధ్వర్యంలోనే రాజ్యాంగ రూపకల్పన జరిగింది. అందరికీ ఆదర్శప్రాయుడిగా నిలిచిన అంబేడ్కర్ కు ఆ పేరు పెట్టిన గురువు ఎవరో తెలుసా? కృష్ణ కేశవ్ అంబేడ్కర్ (krishna keshav ambedkar). నేడు అంబేడ్కర్ జయంతి సందర్భంగా కృష్ణ కేశవ్ ను కూడా తలుచుకోవాల్సి ఉంటుంది. విద్యార్థి భవిష్యత్తును తీర్చిదిద్దడంలో ఉపాధ్యాయుల పాత్ర అధికం. కొందరు ఉపాధ్యాయులు తమ పిల్ల పట్ల నిస్వార్థ ప్రేమ, ప్రోత్సాహాన్ని ఇచ్చేందుకు ఆసక్తి చూపిస్తారు. బాబాసాహెబ్ జీవితంలోకి వచ్చిన ఆ గురువే కృష్ణ కేశవ్ అంబేడ్కర్. ఇతను బ్రాహ్మణుడు. అసమానతలు అధికంగా ఉన్న ఆ కాలంలో బాబాసాహెబ్ స్కూల్ నుండి మొదలు ఎన్నో విషయాల్లో చాలా సవాళ్లు ఎదుర్కొన్నారు. పాఠశాలలో అతనిని భిన్నంగా చూసేవారు. అలాంటి సమయంలో కృష్ణ కేశవ్ అండగా నిలిచారు.
బీఆర్ అంబేడ్కర్ తండ్రి పేరు రామ్ జీ సక్పాల్. వీరి ఇంటి పేరు సక్పాల్. మహర్ కుటుంబంలో జన్మించారు. వీరి కుటుంబం మహారాష్ట్ర రత్నగిరి జిల్లా అంబదావే గ్రామానికి చెందినది. స్కూల్లో చేర్పించే సమయంలో అంబేడ్కర్ తండ్రి అంబదావేకర్ అని నమోదు చేయించారు. ఆ తర్వాత కృష్ణ కేశవ్ అంబేడ్కర్ అనే ఉపాధ్యాయుడు… మన రాజ్యాంగ నిర్మాత పేరును అంబేడ్కర్ గా మార్చారు. ఆ తర్వాత పాఠశాల రికార్డులో అంబేడ్కర్ గా మార్చబడింది. బాబా సాహెబ్ కెరీర్ ముందుకు నడవడంలో ఈయన పాత్ర ఎనలేనిదిగా చెబుతారు. బాబా సాహెబ్ కు చిన్న వయస్సు నుండి గురువు కృష్ణ కేశవ్ ఆయన జీవిత ప్రయాణంలో ముఖ్యమైన పాత్ర పోషించారు.
కాగా, డాక్టర్ బాబా సాహెబ్ అంబేడ్కర్ 132వ జయంతి సందర్భంగా నేడు (శుక్రవారం, ఏప్రిల్ 14) భాగ్యనగరంలో ప్రపంచంలోనే ఎత్తైన రాజ్యాంగ నిర్మాత స్మారకం ఆవిష్కరణ జరుగుతోంది. హుస్సేన్ సాగర్ తీరంలో ఈ భారీ విగ్రహాన్ని మధ్యాహ్నం ముఖ్యమంత్రి కేసీఆర్ ఆవిష్కరిస్తారు. ఈ కార్యక్రమానికి అంబేడ్కర్ మనవడు ప్రకాశ్ అంబేడ్కర్ హాజరవుతున్నారు. పార్లమెంటు ఆకారంలో 50 అడుగుల పీఠంపై ఏర్పాటు చేసిన 125 అడుగుల మెటల్ విగ్రహావిష్కరణ కార్యక్రమానికి ప్రభుత్వం అన్ని ఏర్పాట్లు చేసింది. పీఠం లోపల అంబేడ్కర్ జీవిత ఘట్టాలకు సంబంధించిన ఛాయాచిత్రాలతో ప్రత్యేక ఫోటో ఎగ్జిబిషన్ ను ఏర్పాటు చేశారు. ఎనిమిదేళ్ల క్రితం ఏప్రిల్ 14వ తేదీన అంబేడ్కర్ 125వ జయంతి ఉత్సవాల సందర్భంగా హైదరాబాద్ లో 125 అడుగుల విగ్రహాన్ని ఏర్పాటు చేస్తామని కేసీఆర్ ప్రకటించారు.
