Chennai Modi Idly : చెన్నైలోని స్థానిక కేకే నగర్‌ (వెస్ట్‌) ఉమనుసామి రోడ్డులో బీజేపీ కార్యకర్త ఒకరు ‘మోదీ ఇడ్లీ’ పేరుతో ఓ దుకాణాన్ని నడుపుతున్నారు. సేవా భావంతో వారు నడుపుతున్న ఆ అంగడిలో రూ.10కే మూడు ఇడ్లీలలను ఇస్తున్నారు. అలాగే రూ.5కే ఒక వడను అందిస్తున్నారు. దీంతో మోదీ ఇడ్లీకి ప్రజల నుంచి అపూర్వ స్పందన లభిస్తోంది. శని, ఆది వారాల్లో ఈ దుకాణానికి సెలవు. మిగిలిన రోజుల్లో ఉదయం 6 నుంచి 8 గంటల వరకు మాత్రమే దీన్ని నడుపుతున్నారు.
చదవండి : సముద్రం అడుగున ఉన్న పురాతన ద్వారకను సందర్శించిన మోడీ
ఈ విషయమై దుకాణ యజమాని గోపీనాథన్‌ మాట్లాడుతూ గత ఏడాది డిసెంబర్‌లో దీన్ని ప్రారంభించినట్లు చెప్పారు. ప్రతి రోజూ 280 వరకు ఇడ్లీలను విక్రయిస్తున్నట్లు తెలిపారు. సేవా భావంతో మాత్రమే తాను ఈ దుకాణాన్ని నడుపుతున్నట్లు చెప్పారు. తొలినాళ్లలో ఆదరణ తక్కువగానే ఉండేదన్నారు. అయినా పది రూపాయలకే నాణ్యమైన ఇడ్లీలను మోదీ ఇడ్లీ(Modi Idly) పేరుతో ఇస్తుండటం వల్ల క్రమంగా విక్రయాలు పెరిగినట్లు తెలిపారు.
చదవండి : జరిమానాలు చెల్లించేందుకు జయలలిత నగలు వేలం
ప్రస్తుతం ఈ విక్రయశాల దగ్గర ఉద్యోగులు, కార్మికులు, పేదలు తదితరులు బారులు తీరి మరీ ఇడ్లీలను, వడలను కొనుక్కుంటున్నారు. త్వరలోనే విరుగంబాక్కం శాసన సభ నియోజకవర్గంలో పది ప్రాంతాల్లో ఈ ‘మోదీ ఇడ్లీ’ని ప్రారంభించనున్నట్లు తెలిపారు. గతంలోలా అమ్మ క్యాంటీన్‌లు సరిగ్గా నడవకపోవడం వల్లనే ఇలా మోదీ ఇడ్లీ దుకాణంలో విక్రయాలు పెరుగుతున్నాయని అన్నారు.
