Cycling : చాలా మంది చిన్న వయసులో ఎక్కువగా సైక్లింగ్ చేస్తుంటారు. కొంత మంది పెద్ద వారయ్యాకానూ ఆ అలవాటును కొనసాగిస్తుంటారు. అయితే ఇలా జీవితంలో ఏదో ఒక దశలో సైక్లింగ్ చేసిన వారికి కొన్ని జబ్బులు వచ్చే అవకాశాలు తగ్గుతాయట. ఈ విషయమై 60 ఏళ్లు వయసున్న 2600 మందిపై ఓ అధ్యయనం జరిగింది. ఇందుకు సంబంధించిన ఫలితాలు మెడిసిన్‌ & సైన్స్‌ ఇన్‌ స్పోర్ట్స్‌ & ఎక్సర్‌సై్‌ జర్నల్‌లో ప్రచురితం అయ్యాయి.
చదవండి : ఈదురు గాలులకు పడవ బోల్తా.. ఆరుగురు మృతి
జీవితంలో ఏదో ఒక దశలో ఇలా సైక్లింగ్(Cycling) చేసిన వారికి మోకాళ్ల నొప్పులు(Knee Pain) వచ్చే అవకాశాలు 17 శాతం మేర తగ్గుముఖం పడతాయి. అలాగే కీళ్ల వాతం 21 శాతం తక్కువగా రావచ్చు. పరిశోధకులు ఈ విషయమై మరి కొన్ని ఆసక్తికరమైన విషయాలను వెల్లడించారు. సైక్లింగ్ వల్ల మోకాళ్లు(Knees) దృఢంగా మారతాయన్నారు. అందువల్ల వాటి ఆరోగ్యం మెరుగుపడుతుందని తెలిపారు. కీళ్లు దృఢం కావడంతో వాటికి జరిగే నష్టం కూడా తగ్గుతుందన్నారు.
చదవండి : ఇంటర్నెట్‌పై అధికంగా నిషేధం విధించిన దేశంగా భారత్‌
తాము ఈ అధ్యయనాన్ని దాదాపుగా ఎనిమిదేళ్లపాటు చేశామని పరిశోధకులు చెబుతున్నారు. 12 నుంచి 18 ఏళ్ల మధ్య వయసులో సైక్లింగ్(Cycling) ఎక్కువగా చేసిన వారికి కాళ్ల కండాలు, కీళ్లు బలపడ్డాయని వారు తెలిపారు. అందువల్ల ఆ తర్వాతి కాలంలో వారికి కాళ్ల సంబంధిత అనారోగ్య సమస్యలు కూడా తక్కువగా వస్తుండటాన్ని గుర్తించినట్లు చెప్పారు. ఆ తర్వాతి కాలంలో వారు సైక్లింగ్ మానేసినా కూడా కాళ్ల సమస్యలు తక్కువగా వస్తుండటాన్ని తాము గుర్తించినట్లు తెలిపారు.
