ola electric ipo 2023 price and shares details
ఓలా(ola) ఎలక్ట్రిక్ త్వరలోనే ఐపీఓకు రానున్నట్లు తెలుస్తోంది. ఈ సంస్థ నిన్న(డిసెంబర్ 22న) సెక్యూరిటీస్ అండ్ ఎక్స్ఛేంజ్ బోర్డ్ ఆఫ్ ఇండియాలో డ్రాఫ్ట్ పేపర్‌ను దాఖలు చేసింది. ఇక సెబీ ఆమోదిస్తే త్వరలోనే ఐపీఓకు రానుంది. దీంతో భారతదేశంలో IPOకు రానున్న మొట్టమొదటి ఎలక్ట్రిక్ స్కూటర్ తయారీ కంపెనీగా ఓలా అవతరించనుంది. ఈ ఐపీఓ ద్వారా మార్కెట్ నుంచి రూ.7,250 కోట్లు సమీకరించాలని కంపెనీ లక్ష్యంగా పెట్టుకుంది. ఈ ఐపీఓలో కంపెనీ వ్యవస్థాపకుడు భవిష్ అగర్వాల్ 4.74 కోట్ల షేర్లను విక్రయించాలని యోచిస్తున్నారు.
ఈ నివేదిక ప్రకారం ఈ IPO ద్వారా కంపెనీ 5,500 కోట్ల రూపాయల విలువైన తాజా షేర్లను జారీ చేయబోతోంది. ఆఫర్ ఫర్ సేల్ ద్వారా మొత్తం 95,191,195 ఈక్విటీ షేర్లు జారీ చేయబడతాయి. దీని ముఖ విలువ ఒక్కో షేరుకు రూ.10. దీని ద్వారా రూ.1750 కోట్లు సమీకరించే యోచనలో ఉంది. ఈ IPOలో 75 శాతం వాటా క్వాలిఫైడ్ ఇన్‌స్టిట్యూషనల్ బయ్యర్స్ (QIB) కోసం రిజర్వ్ చేయబడింది. నాన్-ఇన్‌స్టిట్యూషనల్ కొనుగోలుదారులకు 15 శాతం, రిటైల్ ఇన్వెస్టర్లకు 10 శాతం రిజర్వ్ చేయబడింది.
అయితే ఈ ఓలా ఎలక్ట్రిక్ తన IPOను 2024 ప్రారంభంలో ప్రారంభించవచ్చని తెలుస్తోంది. ఇందుకోసం కంపెనీ డిసెంబర్ 22న సెబీకి డ్రాఫ్ట్ పేపర్‌ను సమర్పించింది. కొత్త సంవత్సరం ప్రారంభంలో కంపెనీ తన IPOని ప్రారంభించడంలో విజయవంతమైతే, 2003 తర్వాత ఆటోమొబైల్ కంపెనీ IPO రావడం ఇదే మొదటిసారి. ఇంతకుముందు, మారుతి సుజుకి IPO 2003లో వచ్చింది. ఈ IPOలో కంపెనీ మొత్తం వాల్యుయేషన్ 7 నుంచి 8 బిలియన్ డాలర్లు ఉంటుందని అంచనా వేస్తోంది. కంపెనీ ఇంకా ప్రైస్ బ్యాండ్‌ని నిర్ణయించనప్పటికీ, మీడియా నివేదికల ప్రకారం, IPO సబ్‌స్క్రిప్షన్ తేదీని 2024 ప్రారంభంలో విడుదల చేయవచ్చు.
సెబీకి సమర్పించిన పత్రాల ప్రకారం, కంపెనీ ఓలా సెల్ టెక్నాలజీస్ ఫ్యాక్టరీ ప్రాజెక్ట్ కోసం IPO ద్వారా సేకరించిన మొత్తంలో రూ.1,226.4 కోట్లను ఉపయోగిస్తుంది. పరిశోధన, అభివృద్ధి కోసం రూ.1600 కోట్ల నిధిని ఏర్పాటు చేస్తారు. కంపెనీ సాధారణ కార్పొరేట్ అవసరాలను తీర్చేందుకు దాదాపు రూ.350 కోట్లు వినియోగిస్తారు. రూ.800 కోట్లతో కంపెనీ పాత అప్పును తీర్చనుంది. 2022-23 ఆర్థిక సంవత్సరంలో కంపెనీ ఆదాయం 335 మిలియన్ డాలర్లు. కంపెనీకి 136 మిలియన్ డాలర్ల నష్టం కూడా ఉంది.
ఇది కూడా చూడండి: Ban Anti Cold Syrup: నాలుగేళ్ల పిల్లలకు దేశంలో ఈ సిరప్స్ బ్యాన్
