టాలీవుడ్ సూపర్ స్టార్ మహేష్ బాబు చివరగా సర్కారు వారి పాట మూవీతో ప్రేక్షకులను పలకరించాడు. ఆ తర్వాత ఆయన నుంచి ఏ సినిమా రాలేదు. దీంతో ఆయన గుంటూరు కారం సినిమా ఎప్పుడెప్పుడు ప్రేక్షకుల ముందుకు వస్తుందా అని అభిమానులు ఎదురు చూస్తున్నారు. నిజానికి ఈ మూవీ సమ్మర్ లోనే విడుదల కావాల్సి ఉండగా, పలు కారణాల వల్ల వాయిదా పడుతూ వస్తోంది. కాగా, తాజాగా ఈ మూవీ మరింత ఆలస్యం కానుందని తెలుస్తోంది.
గుంటూరు కారం మూవీకి త్రివిక్రమ్ దర్శకత్వం వహిస్తుండగా, జూన్ 20వ తేదీన మూవీ భారీ షెడ్యూల్ ప్రారంభం కావాల్సి ఉంది. అయితే, ఇప్పుడు ఈ షెడ్యూల్ ప్రారంభం కావడం లేదని తెలుస్తోంది. ఇద్దరు వ్యక్తుల కారణంగా షూటింగ్ ఆగిపోతోందని తెలుస్తోంది. ఇంతకీ మ్యాటరేంటంటే..ఈ మూవీలో హీరోయిన్ గా శ్రీలీల నటిస్తుండగా, ఆమె ప్రస్తుతం చాలా బిజీగా ఉంది. టాలీవుడ్ లో విడుదలకు సిద్ధంగా ఉన్న అన్ని సినిమాల్లోనూ ఆమె హీరోయిన్ గా నటిస్తోంది. దీంతో ఆమెకు కాల్షీట్స్ కుదరక, గుంటూరు కారం మూవీ షూటింగ్ కి డేట్స్ ఇవ్వడం లేదట. మరో వ్యక్తి సీనియర్ నటుడు ప్రకాశ్ రాజ్ కూడా చాలా బిజీగా ఉన్నాడు. ఆయన సినిమాలతో పాటు, రాజకీయంగా కూడా బిజీగా ఉన్నారు. దీంతో ఆయన కూడా డేట్స్ ఇవ్వలేదట. వీరిద్దరూ ఇతర ప్రాజెక్ట్‌లతో బిజీగా ఉండగా, ప్రకాష్ రాజ్‌కు రాజకీయ కమిట్‌మెంట్‌లు కూడా ఉన్నాయని వారు అంటున్నారు. ఒకవేళ వీరిద్దరి డేట్స్ కుదిరితే షూటింగ్ సజావుగా సాగుతుంది లేకపోతే, షెడ్యూల్‌కి మరికొన్ని బ్రేక్‌లు పడవచ్చని సన్నిహితులు వెల్లడించారు.
