VZM: ప్రభుత్వ ఆదేశాల మేరకు మహత్మ జ్యోతిరావు ఫూలే 200వ జయంతి కార్యక్రమాన్ని ఏఫ్రిల్ 11న నిర్వహించనున్నట్లు కలెక్టర్ రాం సుందర్ రెడ్డి గురువారం తెలిపారు. ఆ రోజు ఉదయం 10.00 గంటలకు కలెక్టర్ కార్యాలయం వద్ద ఉన్న పూలేకి నివాళులర్పించి, అనంతరం ఆడిటోరియంలో సభ కార్యక్రమం నిర్వహించడం జరుగుతుందన్నారు. ఇందులో ప్రజా ప్రతినిధిలు పాల్గొననున్నట్లు పేర్కొన్నారు.
ATP: గుంతకల్లు శ్రీనివాసనగర్కు చెందిన లావణ్య, ఆంజనేయులు దంపతుల కుమారుడు సుదీప్ (10) స్థానిక చర్చి స్కూల్లో 4వ తరగతి చదువుతున్నాడు. గురువారం మధ్యాహ్నం తన ఇద్దరు స్నేహితులతో కలిసి ఇంటికి సమీపంలోనే ఉన్న ఎస్ఎస్ ట్యాంక్లోకి ఈత కొట్టేందుకు వెళ్లిన సుదీప్ నీట మునిగి ఊపిరాడకు మృతి చెందాడు. ఈ ఘటనపై పోలీసులు దర్యాప్తు చేపట్టారు.
ATP: తిరుమలలోని మాతృశ్రీ తరిగొండ వెంగమాంబ అన్నప్రసాద కేంద్రాన్ని ఎమ్మెల్యే పరిటాల సునీత సందర్శించారు. అక్కడ భక్తులతో కలిసి భోజనం చేశారు. అనంతరం స్టోర్ రూమ్లో నిల్వ ఉన్న సరుకుల నాణ్యతను పరిశీలించారు. భక్తులకు అందుతున్న సేవలపై ఆరా తీశారు. భక్తులకు నాణ్యమైన ఆహారం అందించడంపై సంతృప్తి వ్యక్తం చేశారు.
KRNL: 2025-26 ఆర్థిక సంవత్సరం ఇంటి పన్ను బకాయిలపై 50 శాతం వడ్డీ మాఫీ గడువును ఈ నెల 30 వరకు పొడగించినట్లు గురువారం నందికొట్కూరు మున్సిపల్ కమిషనర్ వెంకటరామిరెడ్డి తెలిపారు. పన్ను బకాయిదారులు ఈ అవకాశాన్ని సద్వినియోగం చేసుకోవాలని సూచించారు. 2026-27 ఆర్థిక సంవత్సరానికి ప్రస్తుత పన్నుపై రూ.100కి 5శాతం రాయితీ కల్పించినట్లు పేర్కొన్నారు.
PLD: రాజధాని పరిధిలోని గ్రామాల్లో ల్యాండ్ పూలింగ్ ప్రక్రియపై నిన్న రైతులతో మంత్రి నారాయణ, పెదకూరపాడు ఎమ్మెల్యే భాష్యం ప్రవీణ్ సమావేశమయ్యారు. కర్లపూడి, ఎండ్రాయి గ్రామాల్లో రైతులతో నేరుగా మాట్లాడి పలు అంశాలపై చర్చించారు. రెండవ విడత ల్యాండ్ పూలింగ్పై రైతుల్లో ఉన్న అనుమానాలను నివృత్తి చేయడానికి గ్రామ సభలు ఏర్పాటు చేసినట్లు ఎమ్మెల్యే తెలిపారు.
NDL: కొలిమిగుండ్ల రాంకో సిమెంట్ ఎదురుగా శుక్రవారం సీపీఐ చేపట్టనున్న రైతు ధర్నాకు అనుమతి లేదని సీఐ రమేశ్ బాబు తెలిపారు. మండలంలో 30 పోలీస్ యాక్ట్, 144 సెక్షన్ అమలులో ఉన్నాయని ఆయన పేర్కొన్నారు. నిబంధనలు అతిక్రమించి ధర్నా నిర్వహిస్తే చట్టపరమైన చర్యలు తప్పవని హెచ్చరించారు. నాయకులు శాంతిభద్రతలకు విఘాతం కలిగించకుండా సహకరించాలని ఆయన కోరారు.
NLR: ఉలవపాడు మండలం భీమవరం 33/11కేవీ సబ్ స్టేషన్లో శుక్రవారం విద్యుత్ సరఫరాకు అంతరాయం ఏర్పడుతుందని అధికారులు ఒక ప్రకటనలో పేర్కొన్నారు. ఉదయం 9 గంటల నుంచి మధ్యాహ్నం ఒంటిగంట వరకు విద్యుత్ సరఫరా ఉండదన్నారు. బద్దపూడి, రాజుపాలెం, కృష్ణాపురంలో మరమ్మతుల నిమిత్తం పవర్ సప్లయ్ కట్ చేయడం జరుగుతుందన్నారు. ఈ విషయాన్ని వినియోగదారులు గమనించాలని కోరారు.
సత్యసాయి: మాజీ ఎమ్మెల్యే తోపుదుర్తి ప్రకాష్ రెడ్డి గురువారం కనగానపల్లి మండలంలో పర్యటించి పలు మృతుల కుటుంబాలను పరామర్శించారు. అనారోగ్యంతో మరణించిన కనగానపల్లికి చెందిన తలారి ఓబులపతి నివాసానికి వెళ్లి నివాళులర్పించారు. అనంతరం కొండ్రెడ్డి బావి గ్రామానికి చేరుకుని మృతి చెందిన మధుసూదన్ రెడ్డి కుటుంబ సభ్యులను పరామర్శించి ధైర్యం చెప్పారు.
మార్కాపురం జిల్లా పొదిలి కేంద్రంగా అగ్నిమాపక కేంద్రం ఏర్పాటు చేయాలని లోక్ సత్తా పార్టీ ఉమ్మడి ప్రకాశం జిల్లా అధ్యక్షుడు చంద్రశేఖర్ కోరారు. ఈ మేరకు ఆయన గురువారం కలెక్టర్ విజయ సునీతకు వినతి పత్రం అందించారు. పొదిలి మండలం మూగచింతల, కంబాలపాడు గ్రామాల్లో ఇటీవల పొగాకు బ్యారెన్లు తగలబడిన విషయాన్ని ప్రస్తావించినట్లు వెల్లడించారు.
ATP: వైసీపీ ఎస్టీ సెల్ రాష్ట్ర ఉపాధ్యక్షుడిగా గుంతకల్లుకు చెందిన ఎన్.గోవింద్ నాయక్, రైతు విభాగం రాష్ట్ర సంయుక్త కార్యదర్శిగా పామిడికి చెందిన నీలమ్ గోపాల్రెడ్డిలు నియమితులయ్యారు. వైసీపీ అధినేత వైఎస్.జగన్మోహన్ రెడ్డి ఆదేశాల మేరకు ఇరువురినీ ఆయా హోదాల్లో నియమిస్తూ పార్టీ కేంద్ర కార్యాలయం ప్రకటన విడుదల చేసింది.
ELR: ఇంటర్ చదువుతున్న విద్యార్థి బలవన్మరణానికి పాల్పడిన ఘటన ఏలూరులో గురువారం రాత్రి జరిగింది. వెంకటాపురం పంచాయతీ సాయి నగర్లో ఇంటర్ చదువుతున్న విద్యార్థి శివ దుర్గాప్రసాద్(16) ఉరేసుకుని ఆత్మహత్యకు పాల్పడ్డాడు. కుటుంబీకులు స్పందించి శివను ఏలూరు సర్వజన ఆస్పత్రికి తరలించగా పరీక్షించిన వైద్యులు మృతి చెందినట్లు ధ్రువీకరించారు. పూర్తి వివరాలు తెలియాల్సి ఉంది.
అన్నమయ్య: రాజంపేట పట్టణం నూనెవారిపల్లి మార్గంలోని ఆకేపాటి భవనం వద్ద గుర్తుతెలియని యాచకుడు మృతి చెందినట్లు స్థానికులు తెలిపారు. సమాచారం అందుకున్న పోలీసులు ఘటనా స్థలానికి చేరుకుని పరిశీలించారు. యాచకుడికి సుమారు 60 సంవత్సరాలు ఉంటాయని, అతని వద్ద ఆధారాలు ఏమీ లేవని పేర్కొన్నారు. యాచకుడి వివరాలి తెలిస్తే రాజంపేట పీఎస్ని సంప్రదించాలన్నారు. పూర్తి వివరాలు తెలియాల్సి ఉంది.
W.G: ఆచంట మండలం కొడమంచిలిలో 6 ఏళ్ల బాలికపై అఘాయిత్యానికి పాల్పడిన వెంకటస్వామికి సంబంధించిన షాపును పోలీసులు గురువారం జేసీబీతో కూల్చివేశారు. సోమవారం షాపు వద్దకు వెళ్లిన బాలికకు షాపు యజమాని వెంకటస్వామి మాయమాటలు చెప్పి అఘాయిత్యానికి పాల్పడిన విషయం తెలిసిందే. ఈ ఘటనపై ఆచంట పోలీస్ స్టేషన్లో కేసు నమోదు కాగా, పోలీసులు దర్యాప్తును ముమ్మరం చేశారు.
AKP: వైసీపీ 2.0లో యువతకు ప్రత్యేక ప్రాధాన్యం ఇస్తున్నట్లు రాష్ట్ర యూత్ వింగ్ అధ్యక్షుడు బైరెడ్డి సిద్ధార్థ రెడ్డి తెలిపారు. ఉమ్మడి విశాఖ జిల్లా పర్యటనకు వచ్చిన సిద్ధార్థ రెడ్డితో పాయకరావుపేట నియోజకవర్గం వైసీపీ యూత్ వింగ్ అధ్యక్షుడు పి నరేష్ గురువారం భేటీ అయ్యారు. రానున్న రోజుల్లో పార్టీలో యువతకు కీలక బాధ్యతలు అప్పగిస్తామన్నారు.
కోనసీమ: కొత్తపేట ఎమ్మెల్యే బండారు సత్యానందరావు శుక్రవారం పర్యటన వివరాలు ఎమ్మెల్యే కార్యాలయ సిబ్బంది వెల్లడించారు. ఉదయం 8:30 గంటలకు బిళ్ళకుర్రు ఎలక్ట్రికల్ సబ్ స్టేషన్ నందు నూతనంగా ఏర్పాటు చేసిన 11కేవీ ఎలక్ట్రికల్ ఫీడర్ బ్రేకర్ ప్రారంభోత్సవ కార్యక్రమంలో పాల్గొంటారు. 9:30 గంటలకు కొత్తపేట గోగివారిపేటలో SC/ST సూర్యాఘర్ యోజన ఉత్సవ్ ప్రారంభోత్సవంలో పాల్గొంటారు
