భారతదేశ సామాజిక కట్టుబాటు (Indian Culture) ప్రకారం ఒకరే భర్త (Husband).. ఒకరే భార్య (Wife) ఉండాలి. కానీ ప్రస్తుతం కాలం మారుతోంది. పాశ్చాత్య పోకడ.. ఆధునిక సమాజం పేరిట భార్యల సంఖ్య పెరుగుతోంది. అలా ఒక వ్యక్తి ఒకటి కాదు రెండు కాదు ఏకంగా 12 పెళ్లిళ్లు చేసుకున్నాడు. అయితే సాఫీగా సాగుతున్న సంసారంలో ఓ చిన్న గొడవ 12వ భార్యను బలి తీసుకుంది. గొడవ విషయంలో తీవ్ర కోపోద్రిక్తుడైన ఆ భర్త 12వ భార్యను దారుణంగా హత్య చేశాడు. ఈ సంఘటన ఝార్ఖండ్ (Jharkhand)లో చోటుచేసుకుంది. పోలీసుల వివరాల ప్రకారం..
గిరిధ్ జిల్లా (Giridih District) గయాన్ పోలీస్ స్టేషన్ పరిధిలోని జామ్ దార్ పంచాయతీ తారాపూర్ గ్రామానికి చెందిన వ్యక్తి రామచంద్ర. అతడు 12 పెళ్లిళ్లు చేసుకోగా.. మిగతా 11 మంది అతడిని వదిలేసి వెళ్లిపోయారు. 12వ భార్య సావిత్రీదేవితో కలిసి ఉంటున్నాడు. అయితే సావిత్రికి ఇది రెండో వివాహం. ఆమెకు గతంలోనే ముగ్గురు కుమారులు, ఒక కుమార్తె ఉంది. ఏప్రిల్ 1వ తేదీన ఇంట్లో రామచంద్ర మద్యం సేవిస్తున్నాడు. ఈ సమయంలో ఏదో విషయమై భార్యతో గొడవ జరిగింది. మాటామాట పెరిగి తీవ్ర వాగ్వాదానికి దారి తీసింది. ఈ సమయంలో క్షణికావేశానికి లోనైన రామచంద్ర కర్రతో భార్య సావిత్రిపై దాడికి పాల్పడ్డాడు. విచక్షణారహితంగా కొట్టడంతో ఆమె తీవ్ర గాయాలపాలై చనిపోయింది.
స్థానికుల ఫిర్యాదు మేరకు పోలీసులు సంఘటనా స్థలాన్ని పరిశీలించారు. నిందితుడిని పోలీసులు అదుపులోకి తీసుకుని రిమాండ్ కు తరలించారు. కాగా ఇప్పటివరకు రామచంద్రకు సంతానం కలుగలేదు. అందుకే ఏకంగా 12 పెళ్లిళ్లు చేసుకున్నాడు. తమకు పిల్లలు కలగడం లేదని 11 మంది భార్యలు అతడిని వదిలేసి వెళ్లారు. కాగా ఈ సంఘటన సోషల్ మీడియాలో వైరల్ గా మారింది. ఓరి నాయనో 12 పెళ్లిళ్లు ఏంట్రా నెటిజన్లు ఆశ్చర్యపోతున్నారు.