తెలంగాణ కాంగ్రెస్ అధ్యక్షులు రేవంత్ రెడ్డి హాథ్‌ సే హాథ్‌ జోడో యాత్ర సందర్భంగా వరంగల్ జిల్లాలో తీవ్ర ఘర్షణ నెలకొన్న విషయం తెలిసిందే. ఈ యాత్రలో యూత్‌ కాంగ్రెస్ ఉపాధ్యక్షులు తోట పవన్‌ పైన దాడి జరిగింది. వరంగల్ పశ్చిమ ఎమ్మెల్యేను విమర్శిస్తూ కొన్ని కొటేషన్‌లతో కూడిన ఫ్లెక్సీని పట్టుకొని రేవంత్ రెడ్డి వచ్చే మార్గంలో ఆయన నిలబడ్డారు. అదే సమయంలో ఇది చూసిన పలువురు బి అర్ ఎస్ కార్యకర్తలు పవన్‌ను వెంబడించి చితకబాదారు. ఆయన పరుగెత్తగా..పట్టుకొని మరీ కొట్టారు. దీనిని గమనించిన స్థానికులు పెద్ద ఎత్తున అక్కడికి చేరుకోవడంతో రక్తపు మడుగులో పవన్‌ను వదిలేసి వెళ్లిపోయారు. ఈ ఘటన పైన పోలీసులకు ఫిర్యాదు చేశారు. కేసు నమోదు చేసి దర్యాప్తు చేస్తున్నారు.
ఈ ఘటనను నిరసిస్తూ కాంగ్రెస్ రాష్ట్ర వ్యాప్త ఆందోళన పిలుపునిచ్చింది. వరంగల్ కలెక్టరేట్ ఎదుట ధర్నాకు చేయాలని నిర్ణయించింది. ఈ ఘటనకు బాధ్యులైన ఎమ్మెల్యే వినయ్ భాస్కర్ పైన, అతడి అనుచరుడిపై హత్యాయత్నం కేసు నమోదు చేయాలని కాంగ్రెస్ డిమాండ్ చేస్తోంది. అధికార పార్టీ దౌర్జన్యాలపై కాంగ్రెస్ శ్రేణులు రాష్ట్ర వ్యాప్తంగా నిరసన కార్యక్రమాలు చేపట్టడంతో పాటు, అన్ని నియోజకవర్గ కేంద్రాలలో ఈరోజు కేసీఆర్ దిష్టిబొమ్మలు దహనం చేసి నిరసన తెలుపుతున్నారు.
