Cotton Candy: పీచు మిఠాయిని ఇష్టపడని పిల్లలు ఉండరు. పబ్లిక్ ఏరియాలు, పార్కులు, ఎగ్జిబిషన్లలో వీటి అమ్మకాలు ఎక్కువగా కనిపిస్తుంటాయి. అయితే పీచు మిఠాయి తయారీ, అమ్మకాలపై తమిళనాడు ప్రభుత్వం తాజాగా నిషేధించింది. పీచు మిఠాయి తయారీలో రోడమైన్-బి అనే కెమికల్ ఉన్నట్టు ఫుడ్ సేఫ్టీ అధికారులు గుర్తించారు. కృత్రిమ రంగుల కోసం ఉపయోగిస్తున్న ఈ రసాయనం కిడ్నీ, లివర్‌పై ప్రభావం చూపిస్తుందని, దీర్ఘకాలిక సమస్యలకు దారితీస్తుందని అధికారులు నిర్ధారించారు. దీంతో పీచు మిఠాయి తయారీ, అమ్మకాలపై నిషేధం విధిస్తూ రాష్ట్ర ఆరోగ్య మంత్రిత్వ శాఖ శనివారం ఆదేశాలు జారీ చేసింది.
ఇది కూడా చూడండి: Prabhas: ప్రభాస్‌కు ఆ హీరోయిన్ అంటే చాలా ఇష్టం.. కానీ?
ప్రభుత్వ నిర్ణయాన్ని తమిళనాడు ఆరోగ్య శాఖ మంత్రి ఎం.సుబ్రమణియన్ మీడియాకు వెల్లడించారు. చెన్నై వ్యాప్తంగా నమూనాలు సేకరించి చేపట్టిన అధ్యయనంలో రోడమైన్-బి అనే కెమికల్ వాడుతున్నారని తేలినట్టు చెప్పారు. టెక్స్‌టైల్స్‌లో ‘డై’ కోసం ఈ కెమికల్ కాంపౌండ్‌ను వాడుతుంటారని తెలిపారు. రాష్ట్ర ప్రభుత్వ ఉత్తర్వులకు భిన్నంగా తయారీ, విక్రయాలు చేపడితే కఠిన చర్యలు తీసుకుంటామని హెచ్చరించారు. కేంద్రపాలిత ప్రాంతమైన పాండిచ్చేరిలో ఇప్పటికే పీచుమిఠాయిపై నిషేధం విధించారు.
ఇది కూడా చూడండి: Yash: భార్య కోసం కిరాణా కొట్టులో KGF హీరో.. ఇది యష్ అంటే!
