Rajasthan : రాజస్థాన్ కొత్త ముఖ్యమంత్రిగా భజన్ లాల్ శర్మను ప్రకటించారు. శాసనసభా పక్ష సమావేశంలో ఆయన పేరును ప్రకటించారు. ఛత్తీస్గఢ్, మధ్యప్రదేశ్‌ల మాదిరిగానే రాజస్థాన్‌లో కూడా ముఖ్యమంత్రి పేరు ప్రకటనతో పాటు ఇద్దరు డిప్యూటీ సీఎంల పేర్లను ప్రకటించారు. రాజస్థాన్ డిప్యూటీ సీఎంలుగా దియా కుమారి, ప్రేమ్ చంద్ బైర్వా ఎంపికయ్యారు. దీనికి ముందు రాజస్థాన్ చేరుకున్న కేంద్ర పరిశీలకులు రాష్ట్ర బిజెపి సీనియర్ నాయకులతో వారి అభిప్రాయాన్ని తెలుసుకున్నారు. పరిశీలకులు రక్షణ మంత్రి రాజ్‌నాథ్ సింగ్, వినోద్ తావ్డే, సరోజ్ పాండే కూడా మాజీ సిఎం వసుంధర రాజేతో మాట్లాడారు.
చదవండి:Animal: వెయ్యి కోట్ల వైపు దూసుకెళ్తున్న ‘యానిమల్’
భరత్‌పూర్‌కు చెందిన భజన్‌లాల్ శర్మ చాలా కాలంగా పార్టీలో పనిచేస్తున్నారు. రాష్ట్ర ప్రధాన కార్యదర్శిగా సుదీర్ఘకాలం పనిచేశారు. జైపూర్‌లోని సంగనేర్ స్థానం నుంచి తొలిసారి అసెంబ్లీ ఎన్నికల్లో పోటీ చేసి విజయం సాధించారు. సంగనేర్ సిట్టింగ్ ఎమ్మెల్యే అశోక్ లాహోటీ టికెట్‌ను రద్దు చేయడంతో భజన్ లాల్ శర్మను బీజేపీ రంగంలోకి దించింది. 4 సార్లు రాష్ట్ర ప్రధాన కార్యదర్శిగా ఉన్నారు. RSS, ABVPతో ఆయనకు అనుబంధం ఉంది.
చదవండి:CM KCR: యశోద ఆస్పత్రి వద్ద ఉద్రిక్తత.. చేతులెత్తేసిన పోలీసులు
ఛత్తీస్గఢ్, మధ్యప్రదేశ్‌ తరహాలో రాజస్థాన్‌లోనూ బీజేపీ భారీ మెజారిటీ సాధించింది. ఇక్కడ 199 స్థానాలకు గానూ 115 స్థానాల్లో ఆ పార్టీ విజయం సాధించింది. ఈ విజయంతో సీఎంపై పలు ఊహాగానాలు వినిపిస్తున్నాయి. వసుంధర రాజేతో పాటు రైల్వే మంత్రి అశ్విని వైష్ణవ్, గజేంద్ర సింగ్ షెకావత్, సతీష్ పూనియా, రాజ్‌కుమారి దియాతో సహా పలువురు పోటీదారులు ఉన్నారు. అయితే శాసనసభా పక్ష సమావేశంలో తీసుకున్న నిర్ణయంతో ఊహాగానాలకు తెరపడింది. దీనికి ముందు ముఖ్య పరిశీలకులు రాజ్‌నాథ్ సింగ్, వినోద్ తావ్డే, సరోజ్ పాండే ఎమ్మెల్యేలతో ఫోటో సెషన్ కూడా నిర్వహించారు.
