విజువల్ ఎఫెక్ట్స్ స్టూడియోలలో ఒకటైన ఫాంటమ్ డిజిటల్ ఎఫెక్ట్స్ లిమిటెడ్ ఇప్పుడు హైదరాబాద్‌కు వచ్చేసింది. తాజాగా ఈ కంపెనీ స్టూడియోను ప్రముఖ నిర్మాత దిల్ రాజు ప్రారంభించారు. దశాబ్ద కాలంగా Phantom FX తెలుగు, హిందీ, తమిళం, మలయాళం, కన్నడ భాషల్లో చలనచిత్రాలు, టీవీ, వాణిజ్య ప్రకటనలకు ఈ కంపెనీ VFX సేవలను అందిస్తోంది. దేశ, అంతర్జాతీయ ప్రాజెక్ట్‌లలో అధిక నాణ్యతతో కూడిన VFXని ఈ సంస్థ అందిస్తోంది. తాజాగా హైదరాబాద్‌లో ఈ స్టూడియోను ప్రారంభించిన దిల్ రాజు మాట్లాడుతూ సినిమాల్లో మంచి వీఎఫ్‌ఎక్స్ క్వాలిటీగా ఉంటేనే ఆడియన్స్ థ్రిల్‌గా ఫీల్ అవుతారని తెలిపారు. ఫాంటమ్ లో మంచి టాలెంటెడ్ నిపుణులు ఉన్నారన్నారు. నిర్మాతలందరూ ఈ స్టూడియోను చక్కగా వినియోగించుకోవాలని కోరారు.
హైదరాబాద్ స్టూడియో బిజినెస్ హెడ్ సునీల్ ఆకుల మాట్లాడుతూ ఇరవై ఏళ్ల నుండి విజువల్ ఎఫెక్ట్స్ రంగంలో అనేక విజయాలను అందుకున్నామన్నారు. తెలుగు చిత్ర పరిశ్రమలోని నిర్మాతలు, దర్శకులందరికీ అందుబాటులో ఉండటానికి ఈ స్టూడియో బ్రాంచ్ ను హైదరాబాద్ లో ఏర్పాటు చేసినట్లు తెలిపారు.
ఫాంటమ్ ఎఫ్ఎక్స్ CEO, బెజాయ్ అర్పుతరాజ్ మాట్లాడుతూ.. నాణ్యమైన VFXని అందిస్తున్నట్లు తెలిపారు. చెన్నై, ముంబై, హైదరాబాద్‌లలో అత్యాధునిక స్టూడియోలతో, ఫాంటమ్ ఎఫ్ఎక్స్ మంచి గుర్తింపు సాధించిందన్నారు. కార్యక్రమంలో ప్రముఖ నిర్మాత టాగూర్ మధు, హోమ్ బలే సంస్థ ప్రతినిధి కైకాల రామారావు, హర్షిత్ రెడ్డి, దర్శకులు అశ్విన్ గంగరాజు, భరత్, తదితరులు పాల్గొన్నారు.
