Ram Charan: రామ్ చరణ్‌కు హీరోయిన్‌ ఓకె.. కానీ నారాయణ మూర్తినే?

Ram Charan: టాలీవుడ్‌కి ఎంతో మంది హీరోలు ఉన్నా.. వారిలో  ప్రత్యేకంగా చెప్పుకోవాల్సింది ఆర్ నారాయణ మూర్తి గురించి మాత్రమే. ఒకప్పుడు పీపుల్ స్టార్‌గా ఇండస్ట్రీని ఓ ఊపు ఊపేశారు నారాయణ మూర్తి. అర్ధరాత్రి స్వాతంత్రం, దండోరా, ఎర్ర సైన్యం లాంటి బ్లాక్ బస్టర్స్ ఇచ్చారు. ఇప్పటికీ ఎర్రజెండా సాంగ్ వస్తే.. డీజె పెట్టుకొని మోత మోగిస్తున్నారు కుర్రకారు. కానీ మూర్తిగారు మాత్రం తన నమ్మిన సిద్ధాంతాన్ని ఏనాడు వదులుకోలేదు. జనం కోస సందేశాత్మక సినిమాలు చేస్తునే ఉన్నారు. అన్నీ తానై కష్ట, నష్టాలు భరిస్తూ సినిమాలు చేస్తున్నారు.

కానీ మూర్తి తలుచుకుంటే ఎన్టీఆర్, రామ్ చరణ్‌ లాంటి స్టార్ హీరోలందరితోను నటించొచ్చు. కానీ అలా చేయడం లేదు మూర్తి. తమ సినిమాల్లో నారాయణ మూర్తిని నటింపచేయాలని చాలామంది దర్శక, నిర్మాతలు ప్రయత్నం చేశారు. గతంలో పూరి తెరకెక్కించిన టెంపర్ సినిమాలో పోసాని కృష్ణ మురళి పోషించిన మూర్తి పాత్ర కోసం నారాయణ మూర్తిని ట్రై చేశారు. కానీ పూరి జగన్నాథ్, ఎన్టీఆర్ ఎంత అడిగినా.. భారీ రెమ్యునరేషన్ ఆఫర్ చేసినా.. నిర్మొహమాటంగా చేయనని చెప్పేశారు నారాయణ మూర్తి. ఇక ఇప్పుడు మరోసారి మూర్తి దగ్గరికి భారీ ఆఫర్ వెళ్లినట్టుగా తెలుస్తోంది.

బుచ్చిబాబు దర్శకత్వంలో రామ్ చరణ్ చేయనున్న నెక్స్ట్ పాన్ ఇండియా ప్రాజెక్ట్ ఆర్సీ 16లో.. మూర్తిని ఓ కీలక పాత్ర కోసం సంప్రదించినట్టుగా సమాచారం. కానీ మూర్తి మళ్లీ నో చెప్పినట్టుగా తెలుస్తోంది. దీంతో ఇక పై నారాయణ మూర్తిని కమర్షియల్ సినిమాల్లో చూడడం కష్టమనే చెప్పాలి. ఇదిలా ఉంటే.. లేటెస్ట్‌గా ఆర్సీ 16లో హీరోయిన్‌గా జాన్వీ కపూర్ ఫిక్స్ అయినట్టుగా క్లారిటీ ఇచ్చేశారు ఆమె తండ్రి బోనీ కపూర్. కానీ మూర్తి మ్యాటర్‌లో నిజముందా? లేదా? అనే విషయంలోనే క్లారిటీ రావాల్సి ఉంది.