MNCL: రాష్ట్ర ప్రభుత్వం చేపట్టిన ప్రజాపాలన- ప్రగతి ప్రణాళికలో భాగంగా శుక్రవారం చెన్నూరు మండలంలోని అంగరాజుపల్లి ప్రాథమిక ఆరోగ్య కేంద్రంలో వైద్య శిబిరం ఏర్పాటు చేశారు. ఈ సందర్భంగా స్పెషలిస్ట్ వైద్యులతో వివిధ రకాల వైద్య పరీక్షలు ఉచితంగా చేశారు. 99 రోజుల పాటు జిల్లాలోని ప్రాథమిక ఆరోగ్య కేంద్రాలు, ఆసుపత్రులలో వైద్య శిబిరాలు నిర్వహించనన్నునట్లు తెలిపారు.
WGL: పర్వతగిరి మండల కేంద్రంలో మొక్కజొన్న పంటకు తెగుళ్లు సోకడంతో రైతులు తీవ్ర ఆందోళన వ్యక్తం చేస్తున్నారు. పంట చేయితికొచ్చే సమయంలోనే తెగుళ్లు ఏర్పడడంతో పెద్ద ఎత్తున నష్టం వాటిల్లుతోందని వారు పేర్కొన్నారు. వ్యవసాయ శాఖ అధికారులు వెంటనే పొలాలను పరిశీలించి తెగుళ్ల నివారణకు తగిన చర్యలు చేపట్టి, సరైన సూచనలు అందించాలని శుక్రవారం రైతులు విజ్ఞప్తి చేశారు.
MBNR: రైతుల సంక్షేమమే లక్ష్యమని ఎమ్మెల్యే డాక్టర్ కూచుకుళ్ల రాజేశ్ రెడ్డి అన్నారు. శుక్రవారం ఎమ్మెల్యే క్యాంప్ కార్యాలయంలో తిమ్మాజీపేట, బిజినేపల్లి మండలాల రైతులకు ఆయన స్ప్రింక్లర్ పైపులను పంపిణీ చేశారు. తక్కువ నీటితో ఎక్కువ దిగుబడి సాధించేందుకు ప్రభుత్వం ఇచ్చే రాయితీలను రైతులు సద్వినియోగం చేసుకోవాలని కోరారు.
BHPL: ఉప్పసర్పంచుల ఫోరం భూపాలపల్లి జిల్లా ఉపాధ్యక్షుడిగా గణపురం మండలం లక్ష్మీరెడ్డిపల్లి గ్రామ ఉపసర్పంచ్ మొగిలి శంకర్ నియమితులయ్యారు. ఈ సందర్భంగా నూతన ఉపాధ్యక్షుడు శంకర్ మాట్లాడుతూ.. సంఘం సమస్యల కోసం ఎల్లవేళల కృషి చేస్తానని ఆయన హామీ ఇచ్చారు. తన నియామకానికి సహకరించిన జిల్లా అధ్యక్షులకు, నాయకులకు కృతజ్ఞతలు తెలిపారు.
MHBD: డోర్నకల్ మండలంలోని అమ్మపాలెం రైతు వేదికలో ప్రకృతి వ్యవసాయంపై నేడు శిక్షణ కార్యక్రమాన్ని నిర్వహించారు. జిల్లా వ్యవసాయ అధికారిని సరిత, ఆత్మ ఛైర్మన్ సుధాకర్ రెడ్డి పాల్గొని మాట్లాడుతూ.. రైతులు ప్రకృతి వ్యవసాయం పట్ల దృష్టి సారించాలని, పంటల సాగులో మెలకువలను పాటించి అధిక దిగుబడిలను పొందాలని అన్నారు.
SRD: పటాన్ చెరు డివిజన్ బండ్లగూడలో సౌత్ సెంట్రల్ రైల్వే ట్రాక్ పునరుద్ధరణలో భాగంగా ట్రాక్కు ఇరువైపుల 50 మీటర్లలోని కట్టడాలపై సర్వే జరిగింది. ఇళ్లను తొలగిస్తారేమోనని స్థానికులు ఆందోళన చెందుతున్నారు. ప్రజలకు అన్యాయం జరగకుండా ఎంపీ రఘునందన్ రావు, ఎమ్మెల్యే మహిపాల్ రెడ్డితో మాట్లాడతామని మాజీ కార్పొరేటర్ మెట్టు కుమార్ యాదవ్ తెలిపారు.
SRCL: జిల్లాలోని బీసీ, ఎస్సీ, ఎస్టీ విద్యార్థుల ఫీజు రీయింబర్స్మెంట్ బకాయిలను ప్రభుత్వం తక్షణమే విడుదల చేయాలని జాతీయ బీసీ సంక్షేమ సంఘం జిల్లా అధ్యక్షులు మ్యాకల పర్శరాములు డిమాండ్ చేశారు. నిధులు రాక పేద, మధ్య తరగతి విద్యార్థులు ఉన్నత చదువులకు దూరమయ్యే ప్రమాదం ఉందని ఆవేదన వ్యక్తం చేశారు.
GDWL: గద్వాల 37వ వార్డులోని అంగన్వాడీ కేంద్రం-2ను కౌన్సిలర్ మంజుల కిరణ్ ఆకస్మికంగా తనిఖీ చేశారు. చిన్నారులకు అందుతున్న పౌష్టికాహారం, విద్యా బోధనను పరిశీలించి, గర్భిణులు, బాలింతలకు మెరుగైన ఆరోగ్య సేవలు అందించాలని సిబ్బందికి సూచించారు. గర్భిణులు ప్రభుత్వ ఆసుపత్రుల్లోనే ప్రసవం చేసుకోవాలన్న అవగాహన కల్పించాలని ఆమె కోరారు.
KMR: మద్యం తాగి వాహనం నడిపిన కేసులో ఒకరికి సెకండ్ క్లాస్ మెజిస్ట్రేట్ చంద్రశేఖర్ జైలు శిక్ష విధించినట్లు ఎస్సై ఆంజనేయులు తెలిపారు. గురువారం భిక్కనూర్ శివారులో పోలీసులు వాహన తనిఖీలు చేస్తుండగా మద్యం తాగి వాహనాన్ని నడిపిన భాగిర్తిపల్లికి చెందిన స్వామిని నేడు కోర్టులో హజరుపరిచినట్లు వెల్లడించారు. జడ్జి అతనికి ఒక రోజు జైలు శిక్షతో పాటు రూ.1,000 జరిమానా విధించారు.
SDPT: గ్రామాన్ని ప్లాస్టింగ్ రహిత గ్రామంగా తీర్చిదిద్దేందుకు ప్రతి ఒక్కరూ కృషి చేయాలని గ్రామ సర్పంచ్ భూక్య రాజేశ్వరి తిరుపతి నాయక్ పిలుపునిచ్చారు. హుస్నాబాద్ మండలంలోని వంగరామయ్యపల్లి గ్రామంలో ప్రజా పాలన ప్రగతి ప్రణాళికలో భాగంగా పారిశుధ్యం పై గ్రామ ప్రజలకు, గ్రామ పంచాయతీ సిబ్బందికి అవగాహన కల్పించారు. అనంతరం రోడ్డుపై ఉన్న చెత్తను శుభ్రం చేశారు.
NZB: తెలంగాణ ప్రజలు మోదీ పాలన కోరుకుంటున్నారని మల్కాజ్ గిరి ఎంపీ ఈటెల రాజేందర్ అన్నారు. నిజామాబాద్ శివారులోని కమ్మ సంఘం భవనంలో శుక్రవారం నిర్వహించిన బీజేపీ కార్పొరేటర్లు, కౌన్సిలర్ల ఆత్మీయ అభినందన సభలో ఆయన మాట్లాడారు. తెలంగాణలో భవిష్యత్ బీజేపీదేనని అన్నారు. నియంతృత్వ పాలన సాగించిన కేసీఆర్కు పట్టిన గతే రేవంత్కు పడుతుందన్నారు.
SRPT: పదవ తరగతి పబ్లిక్ పరీక్షలకు హాజరయ్యే విద్యార్థులకు కలెక్టర్ తన సొంత ఖర్చులతో పరీక్షా కిట్లు అందించనున్నారు. సూర్యాపేట జిల్లాలోని ప్రభుత్వ, జెడ్పీ, కేజీబీవీ, రెసిడెన్షియల్ పాఠశాలల్లో చదువుతున్న అర్హులైన విద్యార్థులందరికి వీటిని పంపిణీ చేయనున్నట్లు డీఈవో అశోక్ కుమార్ ఇవాళ ఓ ప్రకటనలో తెలిపారు. మరో వారం రోజుల్లో ఆయా పాఠశాలలకు పరీక్షా కిట్లు అందజేస్తామన్నారు.
MBNR: జిల్లా కేంద్రాన్ని రాబోయే ఐదేళ్లలో అద్భుతంగా తీర్చిదిద్దుతామని ఎమ్మెల్యే శ్రీనివాస్ రెడ్డి స్పష్టం చేశారు. జిల్లా కేంద్రంలోని 31వ డివిజన్ గణేశ్ నగర్లో నిర్వహించిన ‘ప్రజాపాలన -ప్రగతి ప్రణాళిక’ కార్యక్రమంలో ఆయన ముఖ్య అతిథిగా పాల్గొన్నారు. 99 రోజుల పాటు సాగే ఈ ప్రణాళికను పక్కాగా అమలు చేసి, ప్రజల అవసరాలను తీరుస్తామని ఈ సందర్భంగా పేర్కొన్నారు.
PDPL: మహిళల హెల్త్ ప్రొఫైల్ తయారీకి కార్యాచరణ రూపొందించాలని కలెక్టర్ శ్రీహర్ష సంబంధిత అధికారులకు సూచించారు. రాఘవాపూర్ పీహెచ్సీలో స్పెషలిస్ట్ ఆరోగ్య సేవల ప్రారంభోత్సవంలో ఆయన పాల్గొని ప్రసంగించారు. మహిళా సంఘాల సభ్యులకు హెల్త్ చెకప్ చేసి, డిజిటల్ హెల్త్ కార్డులు అందించాలని తెలిపారు.
NLG: ‘ప్రజా పాలన-ప్రగతి ప్రణాళిక’ కార్యాచరణలో భాగంగా శుక్రవారం చిట్యాల మండలం, వట్టిమర్తి గ్రామ పంచాయతీలో సన్నాహక సమావేశం నిర్వహించారు. ఈ సందర్భంగా జీపీ ప్రాంగణాన్ని శుభ్రం చేసి, గ్రామ అభివృద్ధి ప్రణాళికలపై చర్చించారు. సర్పంచ్ మేడి శ్రీలత, ఉపసర్పంచ్ బెల్లి భవాని, కార్యదర్శి పరమేష్, వార్డు సభ్యులు అనంతరెడ్డి, మేడి హరికృష్ణ, తదితరులు పాల్గొన్నారు.
