కోలీవుడ్‌తో పాటు టాలీవుడ్‌లో మంచి ఫ్యాన్ ఫాలోయింగ్‌ ఉన్న హీరోల్లో సూర్య కూడా ఒకరు. ఒక్క నటుడిగానే కాకుండా, నిర్మాతగాను రాణిస్తున్నాడు సూర్య. ఆ మధ్య ఆకాశం నీ హద్దురా, జై భీమ్ సినిమాలతో ఆకట్టుకున్న సూర్య రీసెంట్‌గా ‘విక్రమ్’ సినిమాలో గెస్ట్ రోల్ ఇచ్చి రోలెక్స్‌గా అదరగొట్టాడు. ప్రస్తుతం దర్శకుడు బాలాతో ‘అచలుడు’ అనే సినిమా చేస్తున్నాడు సూర్య. ఇక తన కెరీర్లో 42వ సినిమాని మాస్ డైరెక్టర్ శివతో చేయబోతున్నాడు. టాలీవుడ్ ప్రముఖ నిర్మాణ సంస్థ యూవీ క్రియేషన్స్ మరియు స్టూడియో గ్రీన్ బ్యానర్స్ సంయుక్తంగా ఈ చిత్రాన్ని నిర్మిస్తున్నాయి. రీసెంట్‌గా చెన్నైలో పూజా కార్యక్రమాలతో మొదలైన ఈ క్రేజీ ప్రాజెక్ట్‌ను నుంచి.. తాజాగా సాలిడ్ మోషన్ పోస్టర్‌ని రిలీజ్ చేశారు. ఇక ఈ పోస్టర్ చూసిన తర్వాత..
అంచనాలు ఒక్కసారిగా పెరిగిపోయాయి. ఇప్పటి వరకు శివ మాస్ సినిమాలే చేయడంతో.. ఇది కూడా ఓ సాలిడ్ మాస్ స్టోరీ అని అనుకున్నారు. కానీ మోషన్ పోస్టర్ మాత్రం ఊహించని లెవెల్లో ఉంది. డేగ కన్నుతో మంటలు చెలరేగుతున్న యుద్ధ భూమిని చూపిస్తూ.. వారియర్‌గా సూర్య బ్యాక్ సైడ్ లుక్‌ని రివీల్ చేశారు. దాంతో ఈ సినిమా చారిత్రక నేపథ్యంలో విజువల్ గ్రాండియర్‌గా రానుందని చెప్పొచ్చు. ఇక ఈ సినిమాకు రాక్ స్టార్ దేవీ శ్రీ ప్రసాద్ సంగీతాన్ని అందిస్తున్నాడు. జస్ట్ మోషన్ పోస్టర్ బీజిఎంతోనే దేవిశ్రీ ఈ సినిమా పై అంచనాలను పెంచేశాడు. ఈ చిత్రాన్ని 3డీలో 10 భాషల్లో విడుదల చేయనున్నట్లు ప్రకటించారు. ఏదేమైనా సూర్య కెరీర్లోనే ఈ మూవీ భారీ పీరియాడికల్ డ్రామాగా రాబోతోందని చెప్పొచ్చు.
