న్యాచురల్ స్టార్ నాని నటించిన దసరా సినిమా.. వంద కోట్లు కొల్లగొట్టి బాక్సాఫీస్ దగ్గర సత్తా చాటింది. పాన్ ఇండియా లెవల్లో రిలీజ్ అయిన ఈ సినిమా.. మిగతా భాషల్లో ఏమో గానీ.. తెలుగు రాష్ట్రాల్లో మాత్రం కాసుల వర్షం కురిపించింది. ముఖ్యంగా నైజాం ఏరియాలో ఈ మూవీకి మంచి రెస్పాన్స్ వచ్చింది. తెలంగాణ నెటివిటి బ్యాక్ డ్రాప్‌లో తెరకెక్కిన ఈ సినిమాకు.. శ్రీకాంత్ ఓదెల దర్శకత్వం వహించాడు. డెబ్యూ డైరెక్టరే అయినా ‘దసరా’ సినిమా చాలా బాగా హ్యాండిల్ చేశాడనే కాంప్లిమెంట్స్ అందుకున్నాడు. ఫస్ట్ టైం నానిని రగ్గ్‌డ్ క్యారెక్టర్లో చూపించి సాలిడ్ హిట్ అందుకున్నాడు. అందుకే నిర్మాత సుధాకర్ చెరుకూరి ఏకంగా 80 లక్షల బీఎండబ్ల్యూ కార్‌ని గిఫ్ట్‌గా ఇచ్చాడు. మొత్తంగా ఫస్ట్ సినిమాతోనే దర్శకుడిగా మరించి గుర్తింపు తెచ్చుకున్నాడు శ్రీకాంత్ ఓదెల. దీంతో ఈ యంగ్ టాలెంట్‌కు భారీ ఆఫర్లు వస్తున్నట్టు తెలుస్తోంది. ఈ క్రమంలో అక్కినేని కాంపౌండ్ నుంచి పిలుపు వచ్చినట్టు ఇండస్ట్రీ వర్గాల సమాచారం. శ్రీకాంత్ డైరెక్షన్‌లో అఖిల్ హీరోగా ఓ సినిమాను ప్లాన్ చేస్తున్నారట. త్వరలోనే అఖిల్‌కు శ్రీకాంత్ స్టోరీ నరేట్ చేసేందుకు రెడీ అవుతున్నాడట. ప్రస్తుతం అఖిల్ ‘ఏజెంట్’ సినిమాతో బిజీగా ఉన్నాడు. ఏప్రిల్ 28న ఏజెంట్ రిలీజ్ కానుంది. ఆ తర్వాత శ్రీకాంత్‌తో మీటింగ్ ఉంటుందని అంటున్నారు. ఈ సినిమాను దసరా నిర్మాత సుధాకర్ చెరుకూరినే నిర్మించనున్నారట. త్వరలోనే ఈ ప్రాజెక్ట్ పై క్లారిటీ రానుందని అంటున్నారు. మరి నిజంగానే ఈ ప్రాజెక్ట్ ఉంటుందా.. లేదా పుకార్లకే పరిమితమవుతుందో చూడాలి.
