బాలీవుడ్ హిట్ చూసి చాలా కాలం అవుతోంది. ఈ మధ్య సౌత్ సినిమాలే అక్కడ ఆధిపత్యం చెలాయిస్తున్నాయి. గతేడాది పుష్ప, కెజియఫ్ చాప్టర్ 2, కాంతార సినిమాలు బాలీవుడ్ బాక్సాఫీస్‌ను షేక్ చేసేశాయి. అయితే ఇటీవల రిలీజ్ అయిన షారుఖ్ ఖాన్ ‘పఠాన్’ సినిమా మాత్రం.. బాలీవుడ్ వర్గాలకు కొత్త ఊపిరి పోసిందనే చెప్పాలి. ఆనంద్ సిద్ధార్థ్ తెరకెక్కించిన పఠాన్ వసూళ్ల సునామి కురిపించింది. జనవరి 25న రిలీజైన ఈ మూవీ.. ప్రపంచవ్యాప్తంగా రికార్డు కలెక్షన్లు రాబట్టింది. తాజాగా 1000 కోట్ల క్లబ్‌లో చేరింది పఠాన్. బాలీవుడ్‌కే కాదు షారుఖ్ కెరీర్లోనే అత్యధిక వసూళ్లు సాధించిన మూవీగా పఠాన్ నిలిచింది. అలాగే వెయ్యి కోట్లు రాబట్టిన ఇండియన్ సినిమాల జాబితాలో ఐదో స్థానంలో నిలిచింది. ఇప్పటి వరకు ఈ జాబితాలో ఉన్న సినిమాలను ఓసారి చూస్తే..! 2016లో అమీర్ ఖాన్ నటించిన దంగల్ మూవీ.. 2000 కోట్లకు పైగా వసూళ్లను రాబట్టి రికార్డులు క్రియేట్ చేసింది. ఆ తర్వాత 2017లో వచ్చిన ప్రభాస్ ‘బాహుబలి 2’, 1800 కోట్లకు పైగా కలెక్షన్లను రాబట్టింది. ఫస్ట్ టైమ్ సౌత్ నుంచి ఈ సినిమా కనీవినీ రికార్డులు సృష్టించింది. వెయ్యి కోట్ల జాబితాలో బాహుబలి 2 సెకండ్ ప్లేస్‌లో నిలిచింది. ఇక ఆ తర్వాత మరో వెయ్యి కోట్ల సినిమా రాలేదు. కానీ 2022లో రెండు సినిమాలు వెయ్యి కోట్లు కొల్లగొట్టాయి. అది కూడా సౌత్ నుంచే కావడం విశేషం. రాజమౌళి తెరకెక్కించిన ఆర్ఆర్ఆర్ 1200 కోట్లకు పైగా వసూలు చేసింది. ఆ వెంటనే ప్రశాంత్ నీల్ ‘కేజీఎఫ్ చాప్టర్ 2’ 1200 కోట్ల వరకు కొల్లగొట్టింది. ఈ రెండు సినిమాలు మూడు, నాలుగో స్థానంలో నిలిచాయి. ఇక ఇప్పుడు పఠాన్ మూవీ వెయ్యి కోట్ల మైలురాయిని దాటింది. దాంతో వెయ్యి కోట్లు రాబట్టిన ఇండియన్ టాప్ 5 సినిమాలో పఠాన్ నిలిచింది. ఏదేమైనా టాప్ 5లో మూడు సినిమాలు సౌత్ నుంచే నిలవడం విశేషం.
