బెంగళూరులోని కెంపెగౌడ అంతర్జాతీయ విమానాశ్రయంలో ( Kempegodwa International Airport (KIA)) గుండె పోటులో మరణించిన వ్యక్తి కుటుంబానికి రూ.12.1 లక్షలు చెల్లించాలని KIA, ఇండిగో విమాన సంస్థను వినియోగదారుల కోర్టు ఆదేశించింది. 2022లో చంద్ర శెట్టి, అతని భార్య సుమతి, కూతురు దీక్షిత మంగళూరుకు వెళ్లడానికి కెంపెగౌడ అంతర్జాతీయ విమానాశ్రయానికి చేరుకున్నారు. చెక్ ఇన్ ప్రక్రియ తర్వాత శెట్టి నేలపై పడిపోయాడు. అతని కుటుంబ సభ్యులు చేసిన ఫిర్యాదు ప్రకారం సుమతి, దీక్షిత ఇండిగో గ్రౌండ్ స్టాఫ్ తో పాటు విమానాశ్రయ సిబ్బంది నుంచి సహాయం కోరారు. అయితే వారినుంచి ఎలాంటి సహాయం అందలేదు. రోగి పరిస్థితి మరింత దిగజారినప్పటికీ వీల్ చైర్ అందించలేదు. 45 నిమిషాల తర్వాత ఆసుపత్రికి తరలించగా అప్పటికే మార్గమద్యంలో తుది శ్వాస విడిచినట్లుగా డాక్టర్లు తెలిపారు.
బాధిత కుటుంబం ఆ తర్వాత… KIA పోలీస్టేషన్ ను ఆశ్రయించారు. ఇండిగో మరియు BIAL(Bangalore International Airport Limited) పై కేసు నమోదు చేసారు. కేసు పురోగతి సాధించడంలో విఫలమైన తర్వాత, కుటుంబం మార్చి 2022లో శాంతినగర్‌లోని బెంగళూరు అర్బన్ జిల్లా వినియోగదారుల వివాదాల పరిష్కార కమిషన్‌ను ఆశ్రయించింది. విమానాశ్రయ అధికారులు వినియోగదారుల కోర్టు ముందు ఆరోపణలను తిరస్కరించగా, ఇండిగో పదేపదే నోటీసులు ఇచ్చినప్పటికీ ఎటువంటి ప్రతిస్పందనను దాఖలు చేయలేదు. విమానాశ్రయ సిబ్బంది ప్రయాణికుడిని టెర్మినల్‌లోని క్లినిక్‌కి తీసుకెళ్లారని, ఆపై బగ్గీలో ఆస్టర్ ఆసుపత్రికి తరలించారని BIAL సమర్పించింది.
అయితే, కుటుంబ ఆరోపణలను సమర్థిస్తూ, వినియోగదారుల కోర్టు విమానాశ్రయ సిబ్బంది యొక్క విధానం అమానుషంగా ఉందని గమనించింది మరియు ఎయిర్‌లైన్స్ మరియు విమానాశ్రయం అవసరమైన చోట మరియు ఈ సందర్భంలో ప్రయాణీకులకు సురక్షితమైన వాతావరణాన్ని అందించాలని పేర్కొంది. మృతులకు రూ.12.1 లక్షల పరిహారం చెల్లించాలని నగరంలోని వినియోగదారుల కోర్టు KIA మరియు ఇండిగో అధికారులను ఆదేశించింది. సంయుక్తంగా ఫిర్యాదుదారులకు రూ. 12,00,000 మరియు వారి కోర్టు ఖర్చులకు రూ. 10,000 45 రోజులలోపు చెల్లించాలని తీర్పు ఇచ్చింది.
