అసలు సుకుమార్‌కు ‘కార్తికేయ2’ మూవీకి ఎలాంటి సంబంధం లేదు. కానీ కార్తికేయ 2 ఘన విజయం సాధించడంతో సుకుమార్‌కు పెద్ద పనే పడిందని ఇండస్ట్రీ వర్గాల్లో జోరుగా ప్రచారం జరుగుతోంది. ప్రస్తుతం సుక్కు ‘పుష్ప2’ పనులతో బిజీగా ఉన్నాడు. అయినా నిఖిల్ కోసం రంగంలోకి దిగినట్టు తెలుస్తోంది. కార్తికేయ 2 తర్వాత నిఖిల్ నుంచి 18 పేజెస్ అనే సినిమా రాబోతోంది. ఇందులోను హిట్ జోడీ నిఖిల్, అనుపమ పరమేశ్వరన్ హీరో, హీరోయిన్లుగా నటిస్తున్నారు. దాంతో ఖచ్చితంగా ఈ సినిమా పై మంచి బజ్ ఏర్పడే ఛాన్స్ ఉంది. సుకుమార్ రచనలో వస్తున్న ఈ సినిమాను.. అల్లు అర‌వింద్ స‌మ‌ర్ప‌ణ‌లో జిఏ2 పిక్చ‌ర్స్ మరియు సుకుమార్ రైటింగ్స్ బ్యాన‌ర్లు సంయుక్తంగా నిర్మిస్తున్నాయి. కుమారి 21 ఎఫ్ ఫేమ్ సూర్య ప్రతాప్ దర్శకత్వం వహిస్తున్నాడు.
ఇప్పటికే ఈ సినిమా షూటింగ్ కంప్లీట్ చేసుకుంది. కానీ కార్తికేయ2తో నిఖిల్ పై అంచనాలు పెరిగిపోవడంతో.. 18 పేజెస్‌లో కొన్ని కీలక మార్పులు చేస్తున్నట్టు తెలుస్తోంది. సుకుమార్ కూడా ఫైనల్ అవుట్ పుట్‌ విషయంలో సంతృప్తిగా లేరని టాక్. దాంతో కొన్ని సీన్స్ రీ షూట్ చేస్తున్నారని తెలుస్తోంది. గతంలో సుకుమార్ కథతో పల్నాటి సూర్య ప్రతాప్ తెరకెక్కించిన ‘కుమారి 21ఎఫ్’ యూత్‌కు బాగా కనెక్ట్ అయింది. దాంతో మళ్లీ ఆ మ్యాజిక్‌ను రిపీట్ చేయాలని భావిస్తున్నారని చెప్పొచ్చు. పైగా కార్తికేయ 2 హిట్ అయింది కాబట్టి.. 18 పేజెస్‌కు రిపేర్లు చేస్తున్నారని అంటున్నారు. మరి నిఖిల్‌కు సుకుమార్ ఎలాంటి హిట్ ఇస్తాడో చూడాలి.
