పోయిన సంక్రాంతికి వీరసింహా రెడ్డిగా బాక్సాఫీస్ దగ్గర దుమ్ముదులిపేశారు నందమూరి నటసింహం బాలకృష్ణ. గోపీచంద్ మలినేని దర్శకత్వం వహించిన ఈ చిత్రాన్ని.. మైత్రీ మూవీ మేకర్స్ భారీ ఎత్తున నిర్మించింది. అయితే సంక్రాంతి కానుకగా జనవరి 12వ తేదీన విడుదలైన ఈ చిత్రం.. నేటితో 50 రోజుల థియేట్రికల్ రన్‌ను పూర్తి చేసుకుంది. మొత్తం 54 సెంటర్లలో ఆఫ్ సెంచరీ పూర్తి చేసుకుంది. డైరెక్ట్‌గా 23, షిఫ్టింగ్ వైజ్‌గా 54 థియేటర్లలో ఈ ఘనతను సాధించింది. ఈ మధ్య వారాల్లోనే థియేటర్ నుంచి సినిమాలు వెళ్లిపోతుంటే.. వీరసింహారెడ్డి 50 రోజులు ఆడడం నిజంగా అరుదైన విషయమనే చెప్పాలి. ఇక ఈ సినిమా తర్వాత యంగ్ డైరెక్టర్ అనిల్ రావిపూడితో 108వ సినిమా చేస్తున్నారు బాలయ్య. ఇప్పటికే షూటింగ్ స్టార్ట్ అయిపోయింది. ఫస్ట్ షెడ్యూల్‌ను ఒక జైలు సెట్‌లో కంప్లీట్ చేశారు. ఇక సెకండ్ షెడ్యూల్ స్టార్ట్ చెయ్యడమే లేట్ అనుకుంటున్న సమయంలో తారకరత్న మరణించాడు. దాంతో నందమూరి కుటుంబం శోకసంద్రంలో మునిగిపోయింది. తారకరత్న కుప్పకూలిపోయినప్పటి నుంచి.. పెద్ద కర్మ వరకు అన్ని తానై చూసుకున్నాడు బాలయ్య. దాంతో ఎన్బీకె 108 షూటింగ్‌కు బ్రేక్ ఇచ్చారు. అయితే ఇప్పుడు తారకరత్న దశ దిన కార్యక్రమం అయిపోయింది. దాంతో మళ్లీ షూటింగ్‌లో జాయిన్ అయ్యేందుకు రెడీ అవుతున్నారు బాలయ్య. మార్చ్ 4 నుంచి NBK108 సెకండ్ షెడ్యూల్‌ని స్టార్ట్ చెయ్యడానికి సన్నాహాలు జరుగుతున్నాయి. ఈ షెడ్యూల్‌లో హీరోయిన్ కాజల్ అగర్వాల్ కూడా జాయిన్ అవనుందని తెలుస్తోంది. బాలయ్య-కాజల్ పైన కీలక సన్నివేశాలని తెరకెక్కించడానికి రెడీ అవుతున్నాడు అనిల్ రావిపూడి. దసరా కానుకగా ఈ సినిమాను రిలీజ్ చెయ్యడానికి ప్లాన్ చేస్తున్నారు.
