ManchuFamily
మంచు కుటుంబంలో విబేధాలు బయటపడినట్లుగా జోరుగా వార్తలు వస్తున్నాయి. కలెక్షన్ కింగ్ మంచు మోహన్ బాబు తనయులు మంచు విష్ణు, మంచు మనోజ్ మధ్య విబేధాలు వెలుగు చూశాయట. తన ఇంట్లోకి జొరబడి తన వాళ్లను, బంధువులను కొడుతున్నారంటూ మనోజ్ సోషల్ మీడియాలో పోస్ట్ చేయడం నెట్టింట వైరల్ గా మారింది.
ఈ వీడియోలో విష్ణు ఎవరి పైకో దూసుకెళ్తున్నట్లుగా, అతనిని ఇద్దరు వ్యక్తులు అదుపు చేస్తున్నట్లుగా ఉంది. విజువల్స్ లో విష్ణు కనిపించాడు. వాడేదో అంటున్నాడు కదా ఒరేయ్.. ఒరేయ్ అని విష్ణు అరుస్తున్నట్లుగా ఉంది.
ఆ తర్వాత ‘ఇది ఇళ్లలోకి వచ్చి కొడుతుంటారండీ.. మా వాళ్లని, బంధువుల్ని… ఇది సిచ్యువేషన్.. ఇది సిచ్యువేశనండీ’ అంటూ వీడియోలో మనోజ్ చెబుతున్నట్లుగా ఉంది. మనోజ్ రెండో పెళ్లి జరిగినప్పటి నుండి ఇరువురు సోదరుల మధ్య విబేధాలు వచ్చినట్లుగా వార్తలు వస్తున్నాయి. ఈ ఘటన మంచు లక్ష్మి నివాసంలో జరిగినట్లుగా తెలుస్తోంది.
సోదరుల మధ్య విబేధాలు అని వార్తలు వస్తున్నప్పటికీ.. విష్ణు ఎవరి పైన అరుస్తున్నారు, ఈ ఘటన ఎక్కడ జరిగింది అనే విషయాలపై క్లారిటీ రావాల్సి ఉంది. వీటిని ఫేస్ బుక్, ఇన్ స్టా గ్రామ్ లలో పోస్ట్ చేసిన కాసేపటికే మనోజ్ డిలీట్ చేయడం గమనార్హం.
మనోజ్-విష్ణు మధ్య గొడవ ఎందుకు?
మోహన్ బాబు సమీప బంధువు సారథి విషయంలో తాజాగా అన్నదమ్ముల మధ్య గొడవ జరిగినట్లుగా తెలుస్తోంది. అప్పటికే రెండేళ్లుగా విష్ణు – మనోజ్ మధ్య గ్యాప్ కనిపిస్తోందని అంటున్నారు. సారథి మొదటి నుండి మంచు విష్ణుకు అనుచరుడిగా ఉన్నారు. మా ఎన్నికల సమయంలోను అన్నతోనే ఉన్నాడు. కానీ ఆ తర్వాత క్రమంగా అతనికి దూరం జరిగి… తమ్ముడు మంచు మనోజ్ కు దగ్గరయ్యాడు. ఇప్పుడు తమ్ముడికి అనుచరుడిగా ఉన్నాడు. మనోజ్ పెళ్లి సమయంలోను విబేధాలు కనిపించాయని అంటున్నారు.
సారథి కారణంగా తమ అన్నదమ్ముల మధ్య విబేధాలు వచ్చాయని విష్ణు అతనిపై ఆగ్రహంతో ఉన్నారు. అంతేకాదు తన గురించి అనుచితంగా మాట్లాడినట్లుగా చెబుతున్నారు. దీంతో సారథి వద్దకు వెళ్లి విష్ణు దాడి చేసినట్లుగా తెలుస్తోంది. ఈ ఘటనలో అతను స్వల్పంగా గాయపడగా ఆసుపత్రిలో చికిత్స పొందాడు. దాడి విషయం తెలియగానే మనోజ్, సోదరి లక్ష్మీ ప్రసన్న సంఘటన స్థలానికి చేరుకున్నారు. ఈ సందర్భంగా తీసిన వీడియోను మనోజ్ తన సోషల్ మీడియాలో పోస్ట్ చేశారు. తండ్రి ఆగ్రహం వ్యక్తం చేయడంతో వీడియో తొలగించినట్లుగా తెలుస్తోంది.
