ఉత్తరప్రదేశ్‌లోని షాజహాన్‌పూర్‌లో ట్రాక్టర్ ట్రాలీ బోల్తా పడి పెను ప్రమాదం జరిగింది. ఈ ఘటనలో మహిళలు, చిన్నారులు సహా దాదాపు 20 మంది మృతి చెందగా, పలువురు గాయపడ్డారు. ‘భగవత్ కథ’ కోసం గర్రా నది నుంచి నీటిని తీసుకురావడానికి 40 మంది భక్తులు ట్రాక్టర్లో వెళుతున్న క్రమంలో ప్రమదవశాత్తు వాహనం నదిలో పడిపోయింది. ఈ ఘటన థానా తిల్హర్ ప్రాంతంలోని బిర్సింగ్‌పూర్ గ్రామ సమీపంలో చోటుచేసుకుంది. సమాచారం తెలుసుకున్న అధికారులు ఘటనా స్థలానికి చేరుకున్నారు. ఎన్‌డీఆర్‌ఎఫ్‌, ఎస్‌డీఆర్‌ఎఫ్‌ సిబ్బందిచే సహాయక చర్యలు చేపడుతున్నారు. మరోవైపు ఈ ప్రమాదంలో మృతుల సంఖ్య మరింత పెరిగే అవకాశం ఉందని అధికారులు చెబుతున్నారు.
మరోవైపు ఈ విషయం తెలిసిన యూపీ సీఎం యోగి తీవ్ర విచారం వ్యక్తం చేశారు. మృతుల కుటుంబాలకు సీఎం ప్రగాఢ సానుభూతి తెలిపారు. ఈ నేపథ్యంలో ప్రమాదంలో మృతి చెందిన వారి కుటుంబాలకు రూ.2 లక్షలు, క్షతగాత్రులకు రూ.50 వేలు చొప్పున పరిహారం అందజేయనున్నట్లు ప్రకటించారు. దీంతోపాటు క్షతగాత్రులకు వెంటనే చికిత్స అందించాలని జిల్లా అధికార యంత్రాంగాన్ని సీఎం ఆదేశించారు. అలాగే క్షతగాత్రులు త్వరగా కోలుకోవాలని ఆకాంక్షించారు.
చదవండి: Tamilnadu:తమిళనాడులో పరువు హత్య.. కొడుకు, అత్త బలి
