దేశవ్యాప్తంగా హిందువులు జరుపుకునే అత్యంత పవిత్రమైన రోజులలో అక్షయ తృతీయ(Akshaya Tritiya)కూడా ఒకటి. ఈ రోజున ఏదైనా పని ప్రారంభిస్తే అది విజయం సాధిస్తుందని నమ్ముతారు. ప్రధానంగా ఈ రోజును అదృష్టం, విజయం, లాభాలకు ప్రతీకగా భావిస్తారు.
అక్షయ తృతీయ వైశాఖ మాసంలోని శుక్ల పక్షం మూడవ రోజున జరుపుకుంటారు. గ్రెగోరియన్ క్యాలెండర్ ప్రకారం ఇది ఏప్రిల్-మే నెలలో వస్తుంది. ఈ రోజునే సూర్యుడు, చంద్రుడు తమ గ్రహస్థితిలో ఉత్తమంగా ఉంటారని పండితులు చెబుతున్నారు. అంతేకాదు ఈ రోజును ‘అఖా తీజ్’ అని కూడా పిలుస్తారు.
ఈ ఏడాది అక్షయ తృతీయ తిథి ఏప్రిల్ 22, 2023న(April 22nd 2023) ఉదయం 7:49 నిమిషాలకు ప్రారంభమవుతుంది. ఆ తర్వాత రోజు అంటే ఏప్రిల్ 23, 2023న ఉదయం 7:47కి ఇది ముగుస్తుంది. ఈ క్రమంలో అక్షయ తృతీయ పూజ ముహూర్తం ఏప్రిల్ 22న ఉదయం 6.04 నిమిషాల నుంచి మధ్యాహ్నం 12:25 నిమిషాల వరకు ఉంది.
పురాణాలు, పురాతన చరిత్ర ప్రకారం ఈ రోజుకు చాలా ప్రత్యేకతలు ఉన్నాయని పండితులు చెబుతున్నారు. వాటిలో ముఖ్యంగా శ్రీకృష్ణుడితో పాండవులు అజ్ఞాతవాసంలో ఉన్నప్పుడు వారికి ‘అక్షయపాత్ర’ను సమర్పించి గిన్నెతో వారిని ఆశీర్వదించాడని ప్రచారంలో ఉంది. ఆ క్రమంలో అది వారికి ఆహారాన్ని అపరిమితంగా అందించి ఆకలి లేకుండా చేసిందని అంటున్నారు. అంతేకాదు ఈ రోజును శ్రీమహావిష్ణువు యొక్క ఆరవ అవతారమైన పరశురాముని జయంతిగా కూడా జరుపుకుంటారు. మరోవైపు ఇదే రోజు అన్నపూర్ణా దేవి జన్మించింది. శ్రీకృష్ణుడు తన సహాయం కోసం వచ్చిన తన పేద స్నేహితుడు సుదామకు సంపద, ధన లాభాలను కూడా ఇదే రోజు ప్రసాదించాడు. ఈ రోజున గంగా నది స్వర్గం నుంచి భూమిపైకి దిగింది. ఇదే రోజున కుబేరుడు లక్ష్మీ దేవిని ఆరాధించాడు.
చదవండి: Manjeera Pushkaralu ఈనెల 22 నుంచి మంజీరా నది పుష్కరాలు..
