ఈమధ్యకాలంలో చాలా మంది ప్రయాణికులు విమానంలో రచ్చచేయడం గురించి వినే ఉంటారు. తాజాగా ఎయిర్ ఇండియా విమానంలో కూడా ఓ ప్రయాణికుడు అలానే చేశాడు. అయితే… అతని తీరుకి విసుగొచ్చి పైలెట్ ఏకంగా విమానాన్ని వెనక్కి తిప్పాడు. దీంతో విమానాన్ని పైలెట్ మళ్లీ ఢిల్లీ తీసుకువచ్చాడు.
సోమవారం ఉదయం 6 గంటల 35 నిముషాలకు ఈ విమానం ఢిల్లీ నుంచి లండన్ బయల్దేరింది. ఆ కొద్దిసేపటికే ఏ కారణం వల్లో ఓ ప్యాసింజర్.. విమాన సిబ్బందిలో ఇద్దరితో గొడవ పడి వారిపై దాడికి దిగాడు. తోటి ప్రయాణికులు, ఇతర సిబ్బంది ఎంతగా వారించబోయినా ఫలితం లేకపోయింది. దీంతో ఉదయం 9 గంటల 40 నిముషాలకు ఈ ప్లేన్ తిరిగి ఢిల్లీ చేరుకుంది. ఇతని దౌర్జన్యం గురించి ఎయిర్ లైన్స్ అధికారులు మొదట ఢిల్లీ పోలీసులకు సమాచారమందించడంతో ఇతడిని పోలీసులు అదుపులోకి తీసుకున్నారు.
విమానం ఎగురుతుండగా ఇతగాడు ఇద్దరు సిబ్బందిని దుర్భాషలాడుతూ వారిపై భౌతికంగా దాడి చేశాడని ఎయిరిండియా ఓ స్టేట్మెంట్ లో తెలిపింది. దాంతో పైలట్ మళ్ళీ విమానాన్ని తిరిగి ఢిల్లీ చేర్చాడని, ఎయిర్ పోర్టులో ఇతడిని సెక్యూరిటీకి అప్పగించడం జరిగిందని వెల్లడించింది.
‘ఈ ఉదంతంపై ఎఫ్ఐఆర్ దాఖలైంది. ఆ వ్యక్తి చేసిన నిర్వాకం ఫలితంగా ఇతర ప్రయాణికులకు కలిగిన అసౌకర్యానికి చింతిస్తున్నాం’ అని అధికారులు పేర్కొన్నారు. పరిస్థితి సద్దు మణిగిన అనంతరం విమానం మళ్ళీ లండన్ బయల్దేరినట్టు స్పష్టం చేశారు.
