WGL: రాయపర్తి మండలం మైలారం గ్రామంలో నేడు సర్దార్ సర్వాయి పాపన్న గౌడ్ విగ్రహ ఆవిష్కరణ కార్యక్రమాన్ని కొంతమంది అడ్డుకోవడాన్ని నిరసిస్తూ గౌడ సంఘాల నాయకులు ఆందోళన నిర్వహించారు. సబ్బండ జాతులను ఏకం చేసి రాజ్యాధికారాన్ని స్థాపించిన బీసీ నాయకుడి విగ్రహాన్ని అడ్డుకోవడం బాధాకరమని తెలంగాణ గౌడ సంఘం నాయకులు యాదగిరి గౌడ్ విమర్శించారు.
MDK: రోడ్డు ప్రమాదంలో యువకుడికి తీవ్ర గాయాలైన ఘటన ఎల్దుర్తి మండల కేంద్రంలో జరిగింది. మండల కేంద్రానికి చెందిన సుల్తాన్ అవసర నిమిత్తం తన బైక్‌పై కుకునూరు గ్రామానికి వెళ్లి తిరిగి వస్తుండగా, మార్గమధ్యలో వాహనం అదుపు తప్పి కిందపడ్డాడు. తీవ్ర గాయాలు కాగా, స్థానికులు గమనించి కుటుంబ సభ్యులకు సమాచారం అందించారు. చికిత్స నిమిత్తం ఆసుపత్రికి తరలించారు.
NLG: పంచాయతి కార్మికుల న్యాయమైన డిమాండ్ల పరిష్కారానికి ప్రభుత్వం చొరవ చూపాలని CITU జిల్లా కమిటీ సభ్యులు జిట్టా నగేష్ విజ్ఞప్తి చేశారు. చిట్యాలలో శనివారం గ్రామ పంచాయతీ కార్మికులు MPDO కార్యాలయం ముందు ధర్నా నిర్వహించారు. ఈ కార్యక్రమానికి ఆయన హాజరై మాట్లాడుతూ.. ప్రత్యేక బడ్జెట్ కేటాయించి పంచాయితీ కార్మికులకు వేతనాలు చెల్లించాలని ఆయన డిమాండ్ చేశారు.
SRPT: హుజూర్ నగర్ మండల కేంద్రంలోని చెరువుగట్టు శివాలయ కళ్యాణ మండపంలో తెలంగాణ అమెరికన్ ఆర్గనైజేషన్ ఆధ్వర్యంలో 12 మంది వికలాంగులకు శనివారం ట్రై సైకిల్స్ పంపిణీ చేశారు. ఈ సందర్భంగా ఆ సంఘం రీజినల్ వైస్ ప్రెసిడెంట్ వాసా దిలీప్ మాట్లాడుతూ వికలాంగులకు ట్రై సైకిల్స్ అందజేయడం ఎంతో సంతోషంగా ఉందని, ఇలాంటి సేవా కార్యక్రమాలను ప్రతి సంవత్సరం చేస్తామని తెలిపారు.
ADB: ఏజెన్సీలోని ఆదివాసి, గిరిజన గ్రామాల్లో విద్యుత్ సమస్యలను పరిష్కరించాలని ఉట్నూర్ మాజీ ఎంపీపీ జైవంత్ రావు కోరారు. శనివారం సాయంత్రం ఉట్నూర్ పట్టణంలోని విద్యుత్ శాఖ కార్యాలయంలో చీఫ్ ఇంజనీర్ జైవంత్ రావు చౌహన్‌ను ఆయన మర్యాదపూర్వకంగా కలిశారు. ఈ సందర్భంగా ఉమాపతి కుంట, రాంజీగూడా, శుద్ధ గూడా గ్రామాలలో స్తంభాలు ఏర్పాటు చేసి వైర్లు బిగించాలన్నారు.
MDK: ఆందోల్ పెద్ద చెరువులో గుర్తుతెలియని యువకుడి మృతదేహం లభ్యమైంది. చెరువులో మృతదేహం తేలినట్లు స్థానికుల నుంచి సమాచారం తెలుసుకున్న జోగిపేట పోలీసులు ఘటనా స్థలానికి చేరుకున్నారు. మత్స్యకారుల సహాయంతో చెరువులో నుంచి మృతదేహాన్ని పోలీసులు బయటకు తీశారు. మృతుడి పూర్తి వివరాల కోసం జోగిపేట పోలీసులు దర్యాప్తు చేపట్టారు.
HYD: హైడ్రా కూల్చివేతలు ఆగవని.. కొంత గ్యాప్ మాత్రమే వచ్చిందని కమిషనర్ రంగనాథ్ స్పష్టం చేశారు. FTL గుర్తింపు తరువాత హైడ్రా కూల్చివేతలు మొదలవుతాయని చెప్పారు. హైడ్రాకు 15 బృందాలు అందుబాటులో ఉన్నాయన్నారు. హైడ్రా నోటీసులు ఇవ్వదని.. వాటర్ బాడీలో అక్రమ కట్టడాలకు నోటీసులు ఇవ్వాల్సిన అవసరం లేదని చెప్పారు. కొత్త సంవత్సరంలో కూల్చివేతలు షురూ అవుతాయని వెల్లడించారు.
SRPT: నాగారం మండలం పస్తాల గ్రామానికి చెందిన పులుసు వెంకన్నగౌడ్‌ను సర్వాయి పాపన్నగౌడ్ గీత కార్మిక సంఘం జిల్లా అధ్యక్షుడిగా నియమిస్తూ ఆ సంఘం రాష్ట్ర అధ్యక్షులు పరుశరాములు, రాష్ట్ర వర్కింగ్ ప్రెసిడెంట్ మల్లేష్ గౌడ్‌లు శనివారం నియామకపత్రం అందజేశారు. ఈ సందర్భంగా వెంకన్నగౌడ్ మాట్లాడుతూ జిల్లాలో సంఘం బలోపేతం కోసం తన వంతు కృషి చేస్తానన్నారు.
MBNR: జడ్చర్ల పట్టణంలోని రైల్వే స్టేషన్ రోడ్డులో గల హజ్రత్ కాజా అబ్దుల్లా చిష్తీ యాబా దర్గా ఉత్సవాలు నిర్వహించారు. చర్లపల్లి రోడ్డులో గల తాజ్ మస్జిద్ ఉర్సు ఉత్సవాల్లో మాజీ ఎమ్మెల్యే లక్ష్మారెడ్డి శనివారం పాల్గొని, ప్రత్యేక ప్రార్థనలు చేశారు. నియోజకవర్గ ప్రజలు సుఖ:సంతోషాలతో ఉండాలని ప్రార్థించినట్లు ఆయన పేర్కొన్నారు.
SRD: మైనర్లకు వాహనాలు ఇవ్వొద్దని, వారు పోలీసులకు పట్టుబడితే తల్లిదండ్రులదే బాధ్యత అని సిర్గాపూర్ ఎస్ఐ వెంకటరెడ్డి అన్నారు. పోలీస్ స్టేషన్‌లో ఎస్ఐ మాట్లాడుతూ.. బైక్‌లు, ఇతర వాహనాలు ఇస్తే జైలుకు పంపిస్తామని హెచ్చరించారు. పిల్లలు వాహనాలు నడపడంతో ప్రాణాలు కోల్పోతున్నారని, అలాగే ఇతర ప్రయాణికులకూ తీవ్ర ఇబ్బందులు ఏర్పడుతున్నాయని పేర్కొన్నారు.
NRPT: జిల్లా కేంద్రంలోని ఈవీఎం గోదామును శనివారం కలెక్టర్ సిక్తా పట్నాయక్ పరిశీలించారు. అంతకుముందు ఈవీఎం గోదామును అన్ని రాజకీయ పార్టీల నాయకుల సమక్షంలో జిల్లా రెవెన్యూ అదనపు కలెక్టర్ బేన్ షాలం ఆధ్వర్యంలో సంబంధిత అధికారులు తెరవగా… ఈవీఎం గోదాముకు వచ్చిన కలెక్టర్ గోదాంలో గల బ్యాలెట్ యూనిట్లు, కంట్రోల్ యూనిట్లు, వీవీపాట్ బాక్సులను పరిశీలించారు.
KNR: తెలంగాణ రాష్ట్రంలోనే అత్యుత్తమ మార్కెట్‌గా పద్మానగర్ సమీకృత మార్కెట్ ఉండబోతుందని కరీంనగర్ నగర మేయర్ యాదగిరి సునీల్ రావు అన్నారు. కరీంనగర్ నగరపాలక సంస్థ అభివృద్ధిలో భాగంగా 16వ డివిజన్‌లో కమీషనర్ చాహాత్ బాజ్ పాయ్‌తో కలిసి మేయర్ యాదగిరి సునీల్ రావు పద్మానగర్‌లో నూతనంగా నిర్మాణం అవుతున్న సమీకృత మార్కెట్‌ను శనివారం సందర్శించారు.
జనగామ: స్టేషన్ ఘనాపూర్ మండలం ఇప్పగూడెం గ్రామానికి చెందిన సీనియర్ కాంగ్రెస్ పార్టీ నాయకులు దైద యాకూబ్ నేడు మృతి చెందారు. ఎమ్మెల్యే కడియం శ్రీహరి యాకూబ్ పార్థివదేహానికి పూలమాలవేసి నివాళులర్పించారు. కాంగ్రెస్ పార్టీకి ఆయన చేసిన సేవలను మర్చిపోలేనివని శ్రీహరి అన్నారు. మండల కాంగ్రెస్ పార్టీ నాయకులు పాల్గొన్నారు.
GDWL: అలంపూర్ జోగులాంబ బాలబ్రహ్మేశ్వర ఆలయాలను జిల్లా సహకార కేంద్ర బ్యాంక్ ఛైర్మన్ విష్ణువర్ధన్ రెడ్డి శనివారం దర్శించుకున్నారు. ఆయనకు దేవస్థానం ఈవో పురేంద్ర కుమార్, ఛైర్మన్ నాగేశ్వర్ రెడ్డి, ప్రధాన అర్చకులు ఆనంద్ శర్మ ఆలయ మర్యాదలతో స్వాగతం పలికారు. అనంతరం స్వామి వారి తీర్థప్రసాదాలు అందించి, ఆశీర్వచనలు అందించి, శేషవస్త్రాలతో సత్కరించారు.
BDK: లక్ష్మీదేవిపల్లి మండలం రేగళ్లతండా గ్రామ పంచాయతీకి చెందిన వివిధ పార్టీల నాయకులు, కార్యకర్తలు శనివారం కొత్తగూడెం ఎమ్మెల్యే కూనంనేని సాంబశివరావు సమక్షంలో సీపీఐలో చేరారు. వారికి ఎమ్మెల్యే కండువా కప్పి పార్టీలోకి ఆహ్వానించారు. ఎమ్మెల్యే మాట్లాడుతూ.. పార్టీలో చేరిన వారికి సముచిత స్థానం కల్పిస్తామని తెలిపారు.
