తెలంగాణలో (Telangana) బిర్యానీ అంటే ప్రాణం పోసుకుంటారు. హైదరాబాద్ ధమ్ బిర్యానీకి (Hyderabad Dum Biryani) అయితే ఫిదా కాని వ్యక్తి అంటూ ఎవరు ఉండరు. అలాంటి బిర్యానీని ఎట్ల పడితే అట్ల వండితే దాని రుచే రాదు. అన్ని మసాలాలు, పదార్థాలతో పాటు శుభ్రత కూడా పాటిస్తే ఇక ఆ రుచికి ఏదీ సాటి రాదు. కానీ బిర్యానీకి ఉన్న డిమాండ్ ను చూసి కొన్ని హోటళ్లు ప్రమాణాలు పాటించకుండా వండి వడ్డించేస్తున్నాయి. గతంలో చాలా సంఘటనలు చూశాం.. తాజాగా ఓ హోటల్ (Hotel) నిర్వాహకులు దారుణానికి పాల్పడ్డారు. బిర్యానీ బియ్యాన్ని మరుగుదొడ్డిలో కడిగారు. ఇది చూసిన వినయోగదారులు భగ్గుమన్నారు. ‘ఇదేంటిది.. ఇలాగేనా వండేది.. ఎట్ల తినాలి’ అని హోటల్ యాజమాన్యాన్ని నిలదీశారు. ఈ సంఘటన తెలంగాణలోని సిద్దిపేట జిల్లాలో (Siddipet District) చోటుచేసుకుంది.
చదవండి: మనలో మనం కొట్లాడుకుంటే.. KCRకే మేలు: విజయశాంతి వైరల్ ట్వీట్
సిద్ధిపేట పట్టణంలో జాతీయ రహదారిపై సోనీ రెస్టారెంట్ (Sony Restaurant) ఉంది. కొందరు బిర్యానీ తినేందుకు ఆ హోటల్ కు వెళ్లారు. బిర్యానీ ఆర్డర్ ఇచ్చి కూర్చున్నారు. అయితే అక్కడ హోటల్ సిబ్బంది బిర్యానీకి సంబంధించిన బియ్యం.. ఇతర వస్తువులు వాష్ రూమ్ (Wash Room)లోకి తీసుకెళ్లారు. అనుమానం వచ్చిన వినియోగదారులను వారి వెంట వెళ్లారు. లోపలికి వెళ్లి చూడగా దారుణం కనిపించింది. మరుగుదొడ్డి వద్ద బిర్యానీ బియ్యాన్ని (Biryani Rice) కడుగుతున్న దృశ్యాలు కనిపించాయి. ఇది చూసి నివ్వెరపోయిన వినియోగదారులు సిబ్బందిపై ఆగ్రహం వ్యక్తం చేశారు. ‘ఏమిటిది? ఇలాగేనా బిర్యానీ వండేది.. మా ఆరోగ్యం ఏమైపోవాలి? ’ మేనేజర్ (Manager)ను నిలదీశారు. చెడామాడ తిట్టేశారు. ‘ఇంకోసారి ఈ హోటల్ కు రావొద్దు’ అని బిర్యానీ తినకుండానే అక్కడి నుంచి నిష్క్రమించారు. కాగా ఈ వార్త తెలుసుకున్న పోలీసులు, ఫుడ్ సేఫ్టీ (Food Safety Officers) అధికారులు హోటల్ పై చర్యలు తీసుకునే అవకాశం ఉంది. ఇప్పటికే ఈ సంఘటనపై కేసు నమోదు కాలేదు. కానీ ఈ వీడియో సోషల్ మీడియాలో వైరల్ గా మారింది.
చదవండి: రాళ్ల దాడిని తీవ్రంగా పరిగణించిన TDP.. గవర్నర్ కు ఫిర్యాదు.. త్వరలోనే కేంద్రానికి?
