తెలుగుదేశం కేవలం ఓ పార్టీ మాత్రమే కాదని, ఇది ఒక పెద్ద వ్యవస్థ అని ఎమ్మెల్యే, నటుడు నందమూరి బాలకృష్ణ అన్నారు. టీడీపీకి ఉన్న కార్యకర్తలు మరే పార్టీకి లేరని చెప్పడంలో అతిశయోక్తి లేదన్నారు. దివంగత ఎన్టీఆర్ వర్ధంతి సందర్భంగా హైదరాబాద్ ఎన్టీఆర్ ఘాట్ వద్ద కుటుంబ సభ్యులు నివాళులు అర్పించారు. బాలకృష్ణ, నందమూరి రామకృష్ణ, సుహాసిని, ఇతర కుటుంబ సభ్యులు ఉన్నారు. ఈ సందర్భంగా బాలయ్య మీడియాతో మాట్లాడారు. ఎన్టీఆర్ బిడ్డగా పుట్టండం తాను పూర్వజన్మ సుకృతంగా భావిస్తున్నానని చెప్పారు. ప్రజల భవితకు భరోసా ఇచ్చిన అమ్మ, ఆడవాళ్లకు అండగా ఆర్థిక స్వాతంత్రాన్ని ఇచ్చిన అన్న.. ఎన్టీఆర్ అన్నారు. ఆయనను ప్రతి ఒక్కరు స్ఫూర్తిగా తీసుకోవాలన్నారు.
కోట్లాది మంది ప్రజల అభిమానాన్ని సంపాదించుకోవడం ఎన్టీఆర్‌కే సాధ్యమైందన్నారు. బడుగు, బలహీన, వెనుకబడిన వర్గాల అభ్యున్నతికి ఎంతో కృషి చేశారని, టీడీపీని ప్రతి కార్యకర్త ముందుకు నడిపి పూర్వవైభవం తీసుకు వచ్చేందుకు కృషి చేయాలని చెప్పారు. ఎన్టీఆర్ జీవితంలో ఎన్నో ఆటుపోట్లు ఎదుర్కొన్నారని, ఎప్పుడూ ఆయన తలవంచలేదన్నారు. తెలుగువారి ఆత్మగౌరవాన్ని విశ్వవ్యాప్తం చేసిన గొప్ప వ్యక్తి ఎన్టీఆర్ అన్నారు.
