దేశంలో అంత్యంత సంపన్నుడు ఎవరు అనగానే చిన్న పిల్లాడు సైతం అంబానీ పేరు చెబుతాడు. అంబానీ, ఆయన కుటుంబం ఎక్కువగా వారి ఆస్తుల గురించి.. వారు సాధించిన ఘనతలతో వార్తల్లో నిలుస్తూ ఉంటారు. తాజాగా ఆయన మరోసారి వార్తల్లో నిలిచాడు. ప్రపంచంలోనే అత్యంత సంపన్నుల టాప్ 10 జాబితాలో ఉన్న ముకేశ్ అంబానీ ఈ మధ్యన దుబాయ్ లో ఒక లగ్జరీ విల్లాను కొనుగోలు చేశాడు. తన కుమారుడు అనంత్ కోసం ఆయన ఈ విల్లా కొనుగోలు చేయడం గమనార్హం.
తాజాగా ఆయన కొనుగోలు చేసిన లగ్జరీ విల్లా వివరాలు.. వాటి సౌకర్యాలతో పాటు.. దాని కోసం ఆయన చేసిన ఖర్చు లెక్క బయటకు వచ్చింది. పామ్ జుమేరా దీవుల్లో ఆయన కొనుగోలు చేసిన లగ్జరీ విల్లా అది . ప్రపంచంలోనే అత్యంత విలాసవంతమైన విల్లాలకు కేరాఫ్ అడ్రస్ గా దీన్ని చెబుతారు. 33 వేల చదరపు అడుగుల విస్తీర్ణంలో ఎంతో విశాలంగా ఉండే ఈ విల్లాకు చెందిన వీడియో సోషల్ మీడియాలో వైరల్ గా మారింది.
ప్రముఖ పారిశ్రామికవేత్త హర్ష్ గోయెంకా ఈ వీడియోను పోస్టు చేశారు. అంబానీ పేరును నేరుగా ప్రస్తావించని ఆయన.. దుబాయ్ లో ఒక బిలియనీర్ కొన్న విల్లా అంటూ ట్వీట్ చేశారు. దీని ధర మన రూపాయిల్లో 640 కోట్లుగా చెబుతున్నారు. ఈ విల్లాను ముకేశ్ అంబానీ తన చిన్న కొడుకు అనంత్ అంబానీ కోసం కొనుగోలు చేసినట్లుగా తెలుస్తోంది.
ఈ విల్లా ప్రత్యేకత ఏమంటే.. ఇందులో విశాలమైన పది బెడ్రూంలతో పాటు ప్రైవేటు స్పా.. రెండు భారీ స్విమ్మింగ్ పూల్స్ ఉండటంతో పాటు.. ఇటాలియన్ మార్బుల్ తో అత్యద్భుతంగా తీర్చిదిద్దినట్లుగా చెబుతున్నారు. సకల సదుపాయాలకు నెలువుగా ఈ విల్లా ఉంటుందని చెబుతున్నారు. వీడియో చూస్తుంటేనే కళ్లు చెదిరిపోతోంది. అంత సంపన్నులకు ఇలాంటి విల్లా ఒక లెక్క కాదు అనుకోండి.
