ప్రముఖ సినీనటి, బీజేపీ నేత, జాతీయ మహిళా కమిషన్ సభ్యురాలు ఖుష్బూ సుందర్ 2018లో చేసిన ట్వీట్ ఇప్పుడు వైరల్ అవుతోంది. రాహుల్ గాంధీపై లోక్ సభ సచివాలయం అనర్హత వేటు వేసిన సంగతి తెలిసిందే. ఈ క్రమంలో గతంలో మోడీపై ఆమె చేసిన వ్యాఖ్యలను ఇప్పుడు వైరల్ అవుతుండటం గమనార్హం.
2018లో కుష్బూ సుందర్ కాంగ్రెస్ లో వున్నారు. ఆ సమయంలో ప్రధాని మోడీపై ఆమె తీవ్ర వ్యాఖ్యలు చేశారు. మోడీ అంటే అవినీతిగా మారారని ఆమె తీవ్ర వ్యాఖ్యలు చేశారు. మోడీ అంటే అవినీతికి చిరునామా అంటూ తీవ్ర స్థాయిలో ధ్వజమెత్తారు.
ఇక్కడ మోడీ.. అక్కడ మోడీ.. ఎక్కడ చూసినా మోడీ(యహాన్ మోడీ, వహన్ మోడీ, జహాన్ దేఖో మోడీ) …కానీ ఇదంతా ఏంటి. ప్రతి మోడీకి ముందు భ్రష్టాచార్ ఇంటి పేరు ఉందన్నారు. మోడీకి అర్థం భ్రష్టచార్ అని మార్చుకుందాం అంటూ ఆమె ట్వీట్ చేశారు. మోడీ అంటే అవినీతికి చిరునామా అని,నీరవ్, లలిత్, నమో, అవినీతి అని ఖుష్బూ అప్పటి ట్వీట్ లో హ్యాష్ ట్యాగ్ చేశారు.
ఆమె ట్వీట్లను కాంగ్రెస్ నేతలు స్క్రీన్ షాట్ చేసి సోషల్ మీడియాలో షేర్ చేస్తున్నారు. ఇప్పుడు ఖుష్బూ సుందర్ పై గుజరాత్ మంత్రి పూర్ణేష్ మోడీ పరువు నష్టం దావా వేస్తారా వారు ప్రశ్నిస్తున్నారు. దీనిపై బీజేపీ నేతలు సమాధానం చెప్పాలంటూ కాంగ్రెస్ నేతలు డిమాండ్ చేస్తున్నారు.
