టీమిండియా వెటరన్ క్రికెటర్ రాబిన్ ఉతప్ప షాకింగ్ నిర్ణయం తీసుకున్నారు. క్రికెట్ కి వీడ్కోలు పలుకుతున్నట్లు చెప్పాడు. ఏదో ఒక్క ఫార్మాట్ కాకుండా… అన్ని ఫార్మాట్ల నుంచి రిటైర్మెంట్ తీసుకుంటున్నట్లు ఆయన ప్రకటించారు. ఉతప్ప.. 2006లో టీమిండియాలో చోటు దక్కించుకున్నాడు. అప్పటి నుంచి ఆయన చాలా ఫార్మాట్లలో ఆడి.. అభిమానులను సొంతం చేసుకున్నాడు. ఆయన చివరగా 2015లో అంతర్జాతీయ మ్యాచ్ ఆడటం గమనార్హం. అయితే… ఐపీఎల్ లో మాత్రం ఆడుతూ.. అభిమానులను అలరిస్తూ వస్తున్నాడు.
క్రికెట్ కెరీర్‌లో రాబిన్ ఉతప్ప 46 వన్డేలు, 13 టీ20 మ్యాచ్‌లు ఆడాడు. అలానే ఐపీఎల్‌లో 205 మ్యాచ్‌లు ఆడాడు. ఓపెనర్‌గా కెరీర్‌ని ప్రారంభించిన రాబిన్ ఉతప్ప.. ఆ తర్వాత ఫస్ట్ డౌన్.. మిడిలార్డర్‌కి మారాడు. జట్టు అవసరాల మేరకు ఏ స్థానంలో బ్యాటింగ్‌ చేయగల ప్లేయర్‌గా గుర్తింపు పొందాడు. కానీ.. గాయాలు, పేలవ ఫామ్ అతని కెరీర్‌ని దెబ్బతీసింది. అంతర్జాతీయ క్రికెట్ కెరీర్‌లో ఒక్క సెంచరీ కూడా నమోదు చేయలేకపోయిన ఉతప్ప.. ఓవరాల్‌గా 1183 పరుగులు మాత్రమే చేశాడు.
ఐపీఎల్ 2022 సీజన్‌లో చెన్నై సూపర్ కింగ్స్ తరఫున 12 మ్యాచ్‌లాడిన రాబిన్ ఉతప్ప 20.91 సగటుతో కేవలం 230 పరుగులే చేశాడు. దాంతో.. ఐపీఎల్ 2023 సీజన్‌లో అతడ్ని మళ్లీ జట్టులోకి తీసుకోవడంపై చెన్నై ఫ్రాంఛైజీ పునరాలోచనలో ఉన్నట్లు వార్తలు వస్తున్నాయి. ఈ నేపథ్యంలో… 36 ఏళ్ల రాబిన్ ఉతప్ప ఆటకి గుడ్ బై చెప్పాలని నిర్ణయించుకున్నట్లు తెలుస్తోంది. ఇటీవల యూఏఈ వేదికగా ముగిసిన ఆసియా కప్ 2022లో మ్యాచ్ కామెంటేటర్‌గా ఉతప్ప కనిపించాడు. దాంతో ఇకపై కూడా కామెంట్రీ బాక్స్‌లో అతను కొనసాగే అవకాశం ఉంది.
